మహారాష్ట్రలోని హింగోలీ జిల్లాలో జ్యోతి గావ్లీ అనే నర్స్ సుమారు 5 వేల మందికి పురుడు పోశారు. అయితే తన రెండో బిడ్డకు జన్మనిచ్చిన తరువాత వచ్చిన కొన్ని సమస్యల కారణంగా ఆమె మంగళవారం చనిపోయినట్లు వైద్యాధికారులు తెలిపారు. ఈ నెల నవంబర్ 2వ తేదీన హింగోలీలో ప్రజావైద్యశాలలో ఆమెకు రెండో కాన్పు చేశారు అక్కడి వైద్యులు. ఈ క్రమంలోనే గావ్లీకి బైలాటరల్ నిమోనియాతో పాటు ఇతర ఆరోగ్య సమస్యలు వచ్చాయి. దీంతో నాందేడ్లో చికిత్స తీసుకుంటూ.. చనిపోయారు.
" గావ్లీకి ఈ నెల 2వ తేదీన ప్రసవం జరిగింది. ఆ సమయంలో వచ్చిన కొన్ని సమస్యలు వచ్చాయి. దీంతో మెరుగైన వైద్యం కోసం ఆమెను నాందేడ్లోని ప్రభుత్వ ఆసుపత్రికి వెళ్లాల్సిందిగా సూచించాం. అక్కడ చికిత్స పొందుతూ ఆమె చనిపోయారు. "
- వైద్యాధికారులు
డెలివరీ రోజు ముందు వరకు ఆమె హింగోలీలోని ప్రజావైద్యశాలలో విధులు నిర్వహించినట్లు ఆసుపత్రి రెసిడెంట్ మెడికల్ ఆఫీసర్ డా. గోపాల్ కదమ్ చెప్పారు. డెలివరీ పూర్తి అయిన తరువాత ఆమె ప్రసూతి సెలవులు తీసుకోవాల్సి ఉందని పేర్కొన్నారు. ఆమె రెండేళ్లుగా ఆ ఆసుపత్రిలో పనిచేస్తున్నారని అన్నారు. అంతకుముందు మూడేళ్ల పాటు మరో రెండు ఆరోగ్య కేంద్రాల్లో విధులు నిర్వహించినట్లు చెప్పుకొచ్చారు. ఈ ఐదేళ్ల కాలంలో సుమారు 5 వేల మంది డెలివరీలో నర్స్ సాయం చేశారని అన్నారు.
ఇదీ చూడండి: టీకా వేసేందుకు వెళ్లిన ఆరోగ్య సిబ్బందిని చూసి గ్రామస్థులు పరార్
