ఉత్తర్ప్రదేశ్ మేరఠ్లో దారుణ ఘటన వెలుగుచూసింది. ఓ ప్రేమ జంటపై గుర్తుతెలియని వ్యక్తి కాల్పులు జరిపాడు. ఈ ఘటనలో యువతీయువకులిద్దరూ మృతి చెందారు. ఘటనాస్థలం నుంచి పిస్టల్ను స్వాధీనం చేసుకున్న పోలీసులు.. కేసు నమోదు చేసుకుని దర్యాప్తు చేపట్టారు.
పోలీసుల సమాచారం ప్రకారం..
జానీ పోలీస్ స్టేషన్ పరిధిలోని పెప్లా గ్రామానికి చెందిన సాక్షి(19) అనే యువతి, దేవేంద్ర అనే యువకుడు గత రెండేళ్లుగా ప్రేమించుకున్నట్లు సమాచారం. అయితే ఆదివారం సాక్షి ఇంటికి తన ప్రియుడు దేవేంద్ర వెళ్లాడు. ఆ సమయంలో గుర్తుతెలియని వ్యక్తి వారిద్దరిపై కాల్పులు జరిపాడు. సాక్షి కుటుంబ సభ్యులు ఇంటికి వచ్చి చూసేసరికి బుల్లెట్ గాయాలతో ఇద్దరూ అనుమానాస్పద రీతిలో కనిపించారు. దేవేంద్ర మృతదేహానికి సమీపంలోనే ఛాతిపై బుల్లెట్ గాయంతో యువతి అపస్మారక స్థితిలో పడి ఉంది.
దీంతో కుటుంబసభ్యులు యువతిని వెంటనే సుభార్తి ఆస్పత్రికి తరలించారు. అనంతరం పోలీసులకు సమాచారం అందించారు. అయితే హాస్పిటల్లో చికిత్స పొందుతూ యువతి మృతి చెందింది. ఈ ఘటనపై కేసు నమోదు చేసుకున్న పోలీసులు పరువు హత్య అనే కోణంలో దర్యాప్తు చేపట్టారు. ఘటనాస్థలం నుంచి పిస్టల్ను స్వాధీనం చేసుకున్నారు. ఈ ఘటనలో యువతి తండ్రి నగేష్, తమ్ముడిని పోలీసులు అదుపులోకి తీసుకున్నారు. వారితో పాటు యువకుడి కుటుంబ సభ్యులను కూడా అదుపులోకి తీసుకుని విచారిస్తున్నట్లు పోలీసులు తెలిపారు.
అయితే నిందితుడి ఆచూకీను కనిపెట్టేందుకు జీఎస్ఆర్ టెస్టులు కూడా చేయించబోతున్నట్లు పోలీసులు తెలిపారు. పిస్టల్తో యువతిని, యువకుడిని ఎవరు కాల్చారు? ఎలా కాల్చారు? అన్న విషయాలు తెలుసుకునే పనిలో ఉన్నామని ఎస్ఎస్పీ వివరించారు. అయితే బాధితులిద్దరి మొబైల్స్ను స్వాధీనం చేసుకున్నట్లు పోలీసులు తెలిపారు. మొబైల్లో వీరిద్దరూ కలిసి దిగిన ఫొటోలు ఉన్నాయని, వాటిలో కొన్ని అభ్యంతరకరంగా ఉన్నట్లు చెప్పారు.
