Korutla Deepthi Murder Case Update : వీడిన కోరుట్ల దీప్తి హత్య కేసు మిస్టరీ.. చందన, ఆమె ప్రియుడే హంతకులు

Korutla Deepthi Murder Case Update : కోరుట్ల దీప్తి హత్య కేసును పోలీసులు ఛేదించారు. దీప్తిని హత్య చేసింది చెల్లెలు చందన, ఆమె ప్రియుడిగా ప్రాథమికంగా నిర్ధారించారు. తన బాయ్‌ఫ్రెండ్‌తో కలిసి దీప్తిని హత్య చేసినట్లు చందన ఒప్పుకున్నట్లు పోలీసులు తెలిపారు.

Korutla Deepthi Murder Case Update : రాష్ట్రవ్యాప్తంగా సంచలనంగా మారిన కోరుట్ల దీప్తి హత్య కేసు(Korutla Deepthi Murder Case) మిస్టరీని పోలీసులు ఛేదించారు. మృతురాలి చెల్లెలు చందనే తన బాయ్‌ఫ్రెండ్‌తో కలిసి దీప్తిని హత్య చేసినట్లు పోలీసులు ప్రాథమికంగా నిర్ధారించారు. అరెస్టు చేసిన వారి నుంచి రూ.1.20 లక్షల నగదు.. 70 తులాల బంగారాన్ని స్వాధీనం చేసుకున్నామన్నారు. ఈ కేసుకు సంబంధించిన పూర్తి వివరాలను జగిత్యాల జిల్లా ఎస్పీ భాస్కర్‌ వెల్లడించారు. ఆయన తెలిపిన వివరాల మేరకు..

"2019లో మృతురాలి చెల్లెలు బంక చందన హైదరాబాద్‌లోని ఓ ఇంజినీరింగ్‌ కళాశాలలో బీటెక్‌ చదివే సమయంలో.. అదే ప్రాంతానికి చెందిన ఉమర్‌ షేక్‌ సుల్తాన్‌తో పరిచయం కాస్త ప్రేమగా మారింది. అయితే అక్కడ రెండేళ్ల తర్వాత డిటెయిన్‌ అయింది. వీరిరువురు వివాహం చేసుకోవాలని నిర్ణయించుకున్నారు. గత నెల 19న కోరుట్ల వచ్చి చందనతో పెళ్లి విషయమై ఉమర్‌ మాట్లాడాడు. ఇంకా జీవితంలో సెటిల్‌ కాలేదని.. పెళ్లి చేసుకోవాలంటే డబ్బులు కావాలని ఇద్దరు మాట్లాడుకున్నారు. ఇంట్లో ఉన్న బంగారం తీసుకొని వెళ్లి పెళ్లి చేసుకోవాలని అనుకున్నారు.

Korutla Deepthi Murder Case Chandana Victim : చందన తల్లిదండ్రులు హైదరాబాద్‌లో వేడుక ఉందని చెప్పి వెళ్లారు. అప్పుడు చందన ఉమర్‌కు కాల్‌ చేసి.. ఇంట్లో ఎవరూ లేరు కోరుట్ల రావాలని కోరింది. అతను ఆగస్టు 28న అతడు కోరుట్ల చేరుకున్నాడు. వీరి ప్లాన్‌ ప్రకారం ముందుగానే తన అక్క దీప్తికి వోడ్కా, బ్రీజర్‌ను చందన తాగించింది. అనంతరం ఇద్దరూ పడుకున్న తర్వాత చందన.. తన లవర్‌ను ఇంట్లోకి పిలిపించి డబ్బు, బంగారంతో పరారయ్యేందుకు యత్నించింది. ఈ క్రమంలో చప్పుడు కావడంతో లేచిన దీప్తి.. వారిని అడ్డుకోవడంతో చందన వెనుక నుంచి స్కార్ఫ్‌తో గట్టిగా లాగింది.

Korutla IT Employee Deepthi Murder Case : అంతటితో ఆగకుండా ఇద్దరూ కలిసి దీప్తి నోటికి, ముక్కుకు ప్లాస్టర్‌ వేసింది. దీంతో ఆమె ఊపిరి ఆడక చనిపోయింది. అనంతరం ఆమెకు ఉన్న ప్లాస్టర్‌ను తీసి.. సహజ మరణంగా చిత్రీకరించేందుకు ప్రయత్నించారు. ఆ తర్వాత అక్కడి నుంచి బంగారం, నగదుతో వెళ్లిపోయారు. ఇలా వెళ్లిన వీరిని ఆర్మూర్‌ వద్ద బాల్కొండ సమీపంలో సాంకేతిక ఆధారంతో పట్టుకున్నాం" అని ఎస్పీ భాస్కర్‌ వివరించారు. ఈ కేసులో చందనను విచారించగా.. ఆమే హత్య చేసినట్లు ఒప్పుకున్నట్లు పోలీసులు తెలిపారు. ఈ కేసులో భాగమైన చందనను ఏ1గా, ఉమర్‌ను ఏ2గా చేర్చారు. వీరితో పాటు వీరికి సహకరించిన వారిని అరెస్ట్​ చేసి కేసు నమోదు చేశారు.