ఓ రెండున్నరేళ్ల బాలుడు అద్భుతంగా డ్రమ్స్ వాయిస్తూ చూపరులను ఆకట్టుకుంటున్నాడు. కేరళలో తెయ్యం ఉత్సవాల్లో సంప్రదాయ వాద్యం చెండా(డ్రమ్స్) వాయిస్తూ ప్రత్యేక ఆకర్షణగా నిలిచాడు. కళాకారులు నృత్యం చేస్తుండగా డ్రమ్స్ వాయిస్తూ సందడి చేశాడు. అతడే కోజీకోడ్కు చెందిన రెండున్నరేళ్ల మిహన్.
ఉత్తర కేరళలో తెయ్యం సంప్రదాయ నృత్యం. దీన్ని కర్ణాటకలో కొన్ని ప్రాంతాల్లో కూడా పాటిస్తారు. అయితే కోజీకోడ్లోని అన్నసెరీ మనతనాథ్ ఆలయంలో మార్చి 14న తెయ్యం ఉత్సవం జరిగింది. ఆ పండగలో ప్రత్యేక ఆకర్షణగా మిహన్ నిలిచాడు. తెయ్యం కళాకారులు నృత్యం చేస్తుండగా బాలుడి ప్రదర్శన అందరినీ ఆకట్టుకుంది. కేరళ సంప్రదాయ వాద్యం చెండా(డ్రమ్స్) కళాకారులు వాయిస్తుండగా.. మిహన్ తన డ్రమ్ముతో వాళ్ల వద్దకు వెళ్లి వాయించాడు. వారిని చూస్తూ అచ్చం అలానే ఉత్సాహంగా డ్రమ్స్ కొట్టాడు. అది చూసిన తెయ్యం నృత్యకారులు.. మిహన్ను మధ్యలో ఉంచి.. అతడి చుట్టూ డ్యాన్స్ చేశారు. కాగా, ఆ బాలుడిని చూసి చెండా వాయిస్తున్న కళాకారులు ఆశ్చర్యపోయారు. చిన్ని చేతులతో వేగంగా డ్రమ్స్ వాయిస్తున్న బాలుడి దృశ్యాల్ని.. అక్కడ ఉన్నవారు సెల్ ఫోన్లలో బంధించారు.
కోజికోడ్లోని పుత్యంగడి ప్రాంతానికి చెందిన ప్రబిల్, అనూష దంపతుల కుమారుడే మిహన్. ప్రబిల్ వ్యాపారవేత్త కాగా.. అనూష కలెక్టరేట్లో సర్వేయర్గా పనిచేస్తోంది. వీరిద్దరూ రోజువారి పనుల్లో బిజీగా ఉంటారు. వాళ్లు వారి ఆఫీస్లకు వెళ్లే ముందు వారి మిహన్ను అతడి మామయ్య ఇంట్లో విడిచిపెట్టి వెళతారు. ఓ రోజు మిహన్ తన మామయ్యతో కలిసి గుడికి వెళ్లాడు. అక్కడ మిహన్కు అతడి మామయ్య ఓ రోజు చిన్న డ్రమ్ కొనిచ్చాడు. డ్రమ్ను గట్టిగా వాయించి పగలగొట్టాడు మిహన్. అనంతరం మరో డ్రమ్ కొనిచ్చాడు మిహన్ మామ.
అప్పుడే మిహన్కు డ్రమ్స్ వాయించడంపై ఆసక్తి పెరిగింది. మిహన్ ఆసక్తిని అతడి మామ గ్రహించాడు. రెండో సారి కొన్న డ్రమ్మును లయబద్దంగా వాయించడం మొదలు పెట్టాడు మిహన్. ఇక అప్పటినుంచి ఎక్కడికి వెళ్లినా, ఏ పండుగ వచ్చినా.. తన తల్లిదండ్రులను డ్రమ్ కొనివ్వమనేవాడు. సాధారణ సినిమాగా వచ్చి దేశవ్యాప్తంగా సంచలనం సృష్టించిన 'కాంతారా' సినిమాకు మిహన్ పెద్ద ఫ్యాన్. అందులోని తెయ్యం వాయించే పాత్రలా నటిస్తాడు మిహన్. అప్పుడప్పుడు కాంతార సినిమాలో ఉన్న తెయ్యం క్యారెక్టర్లా శబ్దం చేసేవాడని అతడి కుటుంబ సభ్యులు తెలిపారు. మిహన్.. భవిష్యత్లో చెండా వాయించడంలో నిపుణుడు కావాలని.. దాంతో పాటు మిగతా సంగీత వాద్యాలు వాయించడంలో కూడా ఆరితేరాలని కోరుకుంటున్నారు.
