Kashmir Encounter: జమ్ముకశ్మీర్లోని కుల్గాం, అనంతనాగ్ జిల్లాల్లో భద్రతా బలగాలు ఉగ్రవాదుల మధ్య శనివారం కాల్పులు జరిగాయి. అనంతనాగ్ జిల్లా సర్హమా ప్రాంతంలో జరిగిన ఎన్కౌంటర్లో ఓ ఉగ్రవాదిని మట్టుపెట్టారు అధికారులు. ముష్కరుడు లష్కరే తోయిబాకు కమాండర్గా బాధ్యతలు నిర్వహిస్తున్న నిషార్ దార్గా గుర్తించారు. మరోవైపు కుల్గాం జిల్లాలో జరిగిన కాల్పుల్లో మరో ఉగ్రవాది మరణించాడని పోలీసులు తెలిపారు. ఘటనాస్థలాల సమీప ప్రాంతాల్లో గాలింపు చర్యలు చేపడుతున్నట్లు అధికారులు వెల్లడించారు.
అతను కూడా ఉగ్రవాదే: ముంబయి పేలుళ్ల సూత్రదారి, లష్కరే తోయిబా చీఫ్ హఫీజ్ సయీద్ కుమారుడి హఫీజ్ తల్హా సయీద్ను ఉగ్రవాదిగా ప్రకటించింది ప్రభుత్వం. లష్కరే తోయిబాకు నిధులు సమకూర్చడం, దాడులకు ప్రణాళికలు వేయడం వంటి పలు ఉగ్రవాద కార్యక్రమాల్లో చురుకుగా పాల్గొంటున్నట్లు తెలిపింది. చట్టవ్యతిరేక కార్యకలాపాల చట్టం(యూఏపీఏ) 1967 ప్రకారం సయీద్ను ఉగ్రవాదిగా గుర్తించింది. ఇప్పటివరకు భారత్ ప్రకటించిన ఉగ్రవాదుల జాబితాలో తల్పా సయీద్ 32వ వ్యక్తి.
నవంబర్ 26, 2008లో ముంబయిలో జరిగిన ఉగ్రదాడిలో 166 మంది ప్రాణాలు కోల్పోయారు. ఈ దాడుల వెనుక లష్కరే తోయిబా చీఫ్ హఫీజ్ సయీద్ ఉన్నాడు. గతంలో సయీద్ను ఉగ్రవాదిగా భారత్ ప్రకటించింది. ప్రస్తుతం ఉగ్రవాద ఆరోపణలపై పాకిస్థాన్‌లో జైలు శిక్ష అనుభవిస్తున్నాడు హఫీజ్ సయీద్. అతడిని కస్టడీకి ఇవ్వాలని భారత్ ఎప్పటి నుంచో కోరుతున్నప్పటికీ పాకిస్థాన్ అందుకు నిరాకరించింది. ముంబయి 26/11 దాడులతో పాటు, అనేక ఘోరమైన దాడులకు లష్కరే తోయిబా పాల్పడింది. ఈ ఉగ్రవాద సంస్థ వల్ల ఎక్కువగా జమ్ముకశ్మీర్లో అనేక మంది పౌరులు, భద్రతా బలగాలు ప్రాణాలు కోల్పోయారు.
ఇదీ చదవండి: ఆశారాం బాపు ఆశ్రమం వద్ద బాలిక మృతదేహం.. కారులోనే కుళ్లిపోయి..
