దేశీయ ఫార్మా దిగ్గజం భారత్ బయోటెక్ అభివృద్ధి చేసిన కొవిడ్ వ్యాక్సిన్- కొవాగ్జిన్ మూడో దశ క్లినికల్ ట్రయల్స్ కోల్కతా, బెంగళూరులో లాంఛనంగా ప్రారంభమయ్యాయి. కోల్కతాలోని ఐసీఎంఆర్-ఎన్ఐసీఈడీలో తుది దశ ప్రయోగాలను ప్రారంభించారు బంగాల్ గవర్నర్ జగదీప్ ధన్ఖర్.
దేశీయంగా అభివృద్ధి చేసిన వ్యాక్సిన్ తుది దశ క్లినికల్ ట్రయల్స్కు దేశవ్యాప్తంగా ఎంపిక చేసిన రెండు డజన్ల కేంద్రాల్లో ఎన్ఐసీఈడీ ఒకటని తెలిపారు ధన్ఖర్. ఈ ప్రక్రియ ఎలాంటి అడ్డంకులు లేకుండా సాఫీగా కొనసాగుతుందని ఆశాభావం వ్యక్తం చేశారు. కరోనా వ్యాక్సిన్ అభివృద్ధి కేవలం దేశంలోని దూరదృష్టి గల నాయకత్వంతోనే సాధ్యమైందని పేర్కొన్నారు.
బంగాల్ పట్టణ అభివృద్ధి శాఖ మంత్రి ఫర్హాద్ హకీమ్.. కొవాగ్జిన్ తుది దశ ట్రయల్స్లో భాగంగా టీకా వేయించుకున్న తొలి వలంటీర్గా నిలిచారు. అనంతరం.. ఆయన మాట్లాడారు.
''టీకా ట్రయల్స్లో భాగం అయినందుకు సంతోషంగా ఉంది. టీకా వేయించుకున్నాక నేను బాగానే ఉన్నా. ఇందులో భాగంగా నేను చనిపోయినా పట్టించుకోను.''
- హకీమ్, బంగాల్ మంత్రి.
దేశవ్యాప్తంగా మొత్తం 25,800 మంది వలంటీర్లపై తుది దశ ట్రయల్స్ నిర్వహిస్తుండగా.. ఐసీఎంఆర్-ఎన్ఐసీఈడీలో వెయ్యి మంది ఉన్నట్లు తెలిపారు ఆసుపత్రి డైరెక్టర్, శాస్త్రవ్తేత డాక్టర్ శాంత దత్త.
కర్ణాటకలో..
కర్ణాటకలో కొవాగ్జిన్ మూడో దశ క్లనికల్ ట్రయల్స్ను వర్చువల్గా ప్రారంభించారు ముఖ్యమంత్రి బీఎస్ యడియూరప్ప. ఈ ట్రయల్స్ బెంగళూరులోని వైదేహీ ఇన్స్టిట్యూట్ ఆఫ్ మెడికల్ సైన్సెస్ అండ్ రీసర్చ్లో చేపడుతున్నారు. సుమారు 1600-1800 మంది వలంటీర్లపై ఈ ప్రయోగాలు చేస్తున్నట్లు తెలిపారు రాష్ట్ర ఆరోగ్య శాఖ మంత్రి కే సుధాకర్. మూడోదశ ప్రయోగాల్లో ఏ వ్యక్తిపైనా ప్రతికూల ప్రభావం చూపకుండా.. విజయవంతమవుతుందని ఆశాభావం వ్యక్తం చేశారు.
ఇదీ చూడండి: భారత్ బయోటెక్ కొవాగ్జిన్ ప్రయోగాలు ఇలా
