జమ్ముకశ్మీర్లో ఉగ్రవాదుల ఏరివేత(Encounter in kashmir) కొనసాగుతోంది. పుల్వామా జిల్లా, అవంతిపొరాలో జరిగిన ఎదురుకాల్పుల్లో(Pulwama Encounter) ఇద్దరు హిజ్బుల్ ముజాహిద్దీన్ ఉగ్రవాదులు హతమయ్యారు.
జిల్లాలోని పాంపొరా ప్రాంతంలో ఉగ్రమూకలు నక్కి ఉన్నాయన్న పక్కా సమాచారంతో నిర్బంధ తనిఖీలు చేపట్టాయి భద్రతా దళాలు. ఈ క్రమంలో ముష్కరులు కాల్పులకు తెగబడగా.. ప్రతిఘటించిన దళాలు ఇద్దరు ఉగ్రవాదులను మట్టుబెట్టాయి. ఘటనాస్థలం నుంచి పలు ఆయుధాలు స్వాధీనం చేసుకున్నట్లు అధికారులు తెలిపారు. ఉగ్రవాదుల కోసం గాలింపు చర్యలు కొనసాగుతున్నట్లు చెప్పారు.
" అవంతిపొరాలోని ఖ్రూ ప్రాంతంలో జరుగుతున్న ఆపరేషన్లో ఇద్దరు ఉగ్రవాదులు హతమయ్యారు. దక్షిణ కశ్మీర్లో పౌరులను పొట్టనబెట్టుకుంటున్న హిజ్బుల్ ముజాహిద్దీన్ ముఠాకు చెందినవారిగా తెలిసింది. ఒక ఏకే రైఫిల్, ఒక పిస్టోల్ స్వాధీనం చేసుకున్నాం "
- దిల్బాగ్ సింగ్, జమ్ముకశ్మీర్ డీజీపీ.
బలగాల కాల్పుల్లో హతమైన ఉగ్రవాదుల్లో ఒకరు ముసాయిబ్ ముస్తాక్ అని,.. ఈ ఏడాది జులై 23న పాస్తునాలోని ప్రభుత్వ పాఠశాల ప్యూన్ను హత్యచేశాడని కశ్మీర్ ఐజీపీ విజయ్ కుమార్ తెలిపారు.
ఇదీ చూడండి: కశ్మీర్లో ఉగ్ర ఘాతుకం- ముష్కరుల కాల్పుల్లో మరో నేత మృతి
