వ్యాక్సిన్ పంపిణీ ప్రక్రియలో భారత్ అమెరికాను అధిగమించింది. ఈ విషయాన్ని కేంద్ర ఆరోగ్య శాఖ వెల్లడించింది. దేశంలో ఈ ఏడాది జనవరి నుంచి టీకా పంపిణీ చేపట్టగా.. ఇప్పటివరకు 32,36,63,297 డోసులను పంపిణీ చేసినట్లు పేర్కొంది.
గతేడాది డిసెంబరులో వ్యాక్సినేషన్ ప్రారంభించిన అమెరికా.. ఇప్పటివరకు 32,33,27,328 డోసులను మాత్రమే పంపిణీ చేసింది.
భారత్లో ఈ ఏడాది జనవరి నుంచి వ్యాక్సినేషన్ ప్రక్రియ ప్రారంభం కాగా విడతల వారీగా కేంద్రం పంపిణీ చేపడుతోంది. వ్యాక్సినేషన్ ప్రక్రియను విస్తృతం చేసేందుకు కేంద్రం ఇటీవల కొత్త టీకా విధానాన్ని ప్రవేశపెట్టింది. తొలి విడతలో ఫ్రంట్లైన్ వర్కర్లకు టీకా పంపిణీ చేపట్టగా.. రెండో విడతలో 60ఏళ్లు పైబడిన వారు, 45ఏళ్లు దాటి దీర్ఘకాలిక వ్యాధులతో బాధపడుతున్నవారికి వ్యాక్సిన్ల పంపిణీ ప్రారంభించింది. మూడో విడతలో 18ఏళ్లు పైబడిన వారికి కూడా టీకా అందిస్తోంది.
ప్రస్తుతం దేశంలో కొవాగ్జిన్, కొవిషీల్డ్ టీకాలు అందుబాటులో ఉన్నాయి. త్వరలోనే విదేశీ టీకాలు కూడా అందుబాటులోకి వస్తాయని కేంద్రం ఇటీవల స్పష్టం చేసింది.
ఇదీ చదవండి : 'కాకులు, కొంగలు తింటాం.. మాకు టీకా వద్దు'
