కొందరు రోడ్ల మీద వెళుతున్నప్పుడు హారన్లు విపరీతంగా కొడతారు. బైక్, కార్లతో వచ్చే హారన్లను తీసేసి, వాటికన్నా పెద్ద శబ్దం చేసే వాటిని పెట్టుకుంటారు. సైలెన్సర్లు కూడా పెద్ద పెద్ద శబ్దాలు చేయడం మనం వినే ఉంటాం. వీటవల్ల చట్టుపక్కన భవనాల్లో నివసించే వారికి తీవ్ర ఇబ్బందులు ఎదురవుతున్నాయి. ఈ వ్యవహారాన్ని మహారాష్ట్ర ఠాణె పోలీసులు సీరియస్గా తీసుకున్నారు. రోడ్డు రోలర్తో తొక్కించి ఆ హారన్లు, సైలన్సర్లను ధ్వంసం చేశారు.
ప్రజల ఫిర్యాదుతో..
ఠాణెలో ట్రాఫిక్ ఎక్కువే ఉంటుంది. ఈ కారణంగా అడ్డూఅదుపు లేకుండా హారన్ల మోత మోగిస్తూనే ఉంటారు వాహనదారులు. తమకు ఇబ్బందిగా ఉందని పోలీసులకు ఫిర్యాదు చేశారు ప్రజలు. దీంతో జూన్15న రంగంలోకి దిగారు ఠాణె ట్రాఫిక్ పోలీసులు. అప్పటి నుంచి పట్టుకున్న 1000కిపైగా సైలెన్సర్లు, 400 హారన్లను ఓ రోడ్డుపై పెట్టి, రోడ్డు రోలర్ చేత వాటిని ధ్వంసం చేశారు.
ఈ క్రమంలో ద్విచక్రవాహనదారులకు హెచ్చరికలు జారీ చేశారు. ఎక్కువ శబ్దాలు వచ్చే హారన్లు, సైలెన్సర్లను వాహనాలకు బిగిస్తే చర్యలు చేపడతామని తేల్చిచెప్పారు. వాటిని విక్రయించే వారిపైనా చర్యలు తీసుకుంటామని స్పష్టం చేశారు.
ఇదీ చూడండి:- కత్తితో బెదిరించి చీర దొంగతనం- నిందితుడిపై ఎన్ఎస్ఏ కేసు
