సరిహద్దు రహదారుల నిర్మాణ సంస్థ (బీఆర్ఓ) తొలిసారిగా ఆర్మీ మహిళా అధికారిని ఆఫీసర్ కమాండింగ్గా నియమించినట్లు రక్షణ శాఖ స్పష్టం చేసింది. ఉత్తరాఖండ్లోని 75 రహదారి నిర్మాణ సంస్థ(ఆర్సీసీ)కు ఈ అధికారిని నియమించినట్లు తెలిపింది. మేజర్ ఆయినా సారథ్యంలో కెప్టెన్ అంజనా, భావన జోషి, విష్ణుమయ కేలకు కూడా కీలక బాధ్యతలు అప్పగించినట్లు పేర్కొంది.
ఆగస్టు 30నే ఈ అధికారుల నియామకం ఖరారు కాగా.. ఈ ఏడాదిలో మహిళా అధికారుల నియామకానికి సంబంధించిన జాబితాను మరోసారి విడుదల చేసింది బీఆర్ఓ. బీఆర్ఓ తమ సంస్థలో పెద్ద ఎత్తున మహిళలకు అవకాశం కల్పిస్తోందని రక్షణ శాఖ ఓ ప్రకటనలో పేర్కొంది. ఆఫీసర్ల నుంచి కమర్షియల్ పైలట్ లైసన్స్ హోల్డర్స్ వరకు చాలా మందిని నియమిస్తోందని స్పష్టం చేసింది.
"జనరల్ రిజర్వ్ ఇంజనీరింగ్ ఫోర్స్ ఆఫీసర్ వైశాలి ఎస్ హివాసే.. ఏప్రిల్ 28న 83 రహదారి నిర్మాణ సంస్థకు అధికారిగా నియమితులయ్యారు. మునిసైరి-బుగ్దియార్-మిలమ్ ప్రాంతాలను కలిపే భారత్-చైనా కీలక రహదారికి ఆమెను అధికారిగా నియమించారు. ఛాలెంజింగ్గా ఉండే ఈ ప్రాంతంలో మహిళా అధికారి తమ టీమ్తో విధులు నిర్వర్తిస్తున్నారు" అని రక్షణ శాఖ ప్రకటనలో పేర్కొంది.
శివాలిక్ ప్రాజెక్టు పనులు చేపట్టిన మేజర్ ఆయినా.. తొలిసారిగా ఆఫీసర్ కమాండింగ్గా నియమితులయ్యారు. ఉత్తరాఖండ్ చమౌలీ జిల్లాలోని పిపాల్కోటి 75 రోడ్ కన్స్ట్రక్షన్ కంపెనీస్కు ఆమె అధికారిగా ఉంటారు. అయితే, మిగతా ముగ్గురు మహిళా అధికారులు కూడా బీఆర్ఓలో కీలక బాధ్యతలు చేపట్టనున్నారు. ఈ నేపథ్యంలో.. మహిళా సాధికారత దిశగా బీఆర్ఓ ఈ నిర్ణయం తీసుకున్నట్లు రక్షణ శాఖ తమ ప్రకటనలో పేర్కొంది.
ఇదీ చదవండి: డ్రోన్ దాడులను ఎదుర్కొనేందుకు ఇక ఆ ఆయుధాలు!
