కేంద్ర ప్రభుత్వ భూమినే మింగేయాలని కేటుగాళ్లు ప్లాన్ చేసి పోలీసులకు చిక్కారు. హిందుస్థాన్ ఏరోనాటిక్స్ లిమిటెడ్ (హెచ్ఏఎల్)కు చెందిన భూమి ఫేక్ డాక్యుమెంట్లు తయారు చేశారు. అనంతరం ఆ భూమిని ఇతరులకు లీజుకు ఇచ్చి రూ.కోట్లు సంపాదించారు. కర్ణాటకలోని బెంగళూరులో ఈ ఘటన జరిగింది. హెచ్ఏఎల్ అధికారుల ఫిర్యాదుతో పోలీసులు ఈ ఘటనపై కేసు నమోదు చేసుకున్నారు. నిందితులు సయ్యద్ మునావర్ సబ్రి, ప్రతాప్, సయ్యద్ అఫ్రోజ్, రాజ్ కుమార్, శ్రీనివాస మూర్తి, వైజయంత్లపై కేసు నమోదు చేశారు. వీరంతా కేంద్ర ప్రభుత్వ ఆధ్వర్యంలో ఉన్న భూములపైనే కన్నేశారని పోలీసులు తెలిపారు. పాత ఎయిర్పోర్టు రోడ్కు సమీపంలోని 833 ఎకరాల హెచ్ఏఎల్ భూమికి సంబంధించి నకిలీ పత్రాలు సృష్టించారని చెప్పారు.
ఇదీ కథ
పోలీసులు చెప్పిన కథనం ప్రకారం.. హెచ్ఏఎల్ నుంచి భూమిని లీజుకు తీసుకున్నామని నిందితులు ఫేక్ డాక్యుమెంట్లను సృష్టించారు. హెచ్ఏఎల్ సీల్ను, అధికారుల సంతకాలను ఫోర్జరీ చేశారు. ఫేక్ పత్రాల ఆధారంగా ఇద్దరు వ్యక్తులను మోసం చేశారు. భూమిని 30 ఏళ్లకు లీజుకు తీసుకున్నామని.. వ్యాపార కార్యకలాపాల కోసం దాన్ని అద్దెకు ఇస్తామని వారి నుంచి రూ.కోట్లు వసూలు చేశారు. ఈ వ్యవహారం గురించి హెచ్ఏఎల్ అధికారులకు తెలిసింది. దీనిపై పోలీసులను ఆశ్రయించి ఫిర్యాదు చేశారు. రంగంలోకి దిగిన పోలీసులు.. ఏడుగురు నిందితులను అరెస్ట్ చేశారు. ప్రధాన నిందితుడు బినీశ్ థామస్ పరారీలో ఉన్నాడని చెప్పారు.
భార్య కోసం హ్యాకర్గా మారి..
ఓ సాఫ్ట్వేర్ ఇంజనీర్ తన భార్యను ఇంప్రెస్ చేసేందుకు ఎవరు చేయని ఆలోచన చేశాడు. విదేశాలకు వెళ్లాలన్న తన భార్య కోరికను తీర్చేందుకు ఏకంగా పాస్పోర్ట్ కార్యాలయంలోని పలు ఫైళ్లను హ్యాక్ చేశాడు. ఈ ఘటన ఉత్తర్ప్రదేశ్లో జరిగింది.
గాజియాబాద్కు చెందిన ఓ రాజాబాబు సాఫ్ట్వేర్ ఇంజనీర్గా పనిచేస్తున్నాడు. విదేశాలకు వెళ్లాలన్న తన భార్య కోరిక కోసం పాస్పోర్టు కార్యాలయంలోని కొన్ని ఫైళ్లను హ్యాక్ చేశాడు. దీనిని గుర్తించిన బాధితుల ఫిర్యాదు మేరకు విచారణ చేపట్టిన పోలీసులు నిందితుడిని అరెస్టు చేశారు. కాగా, ఈ ఘటన గతేడాది సెప్టెంబరు 24న జరగ్గా.. అదే నెల 26న అధికారుల దృష్టికి వచ్చింది. అయితే పాస్పోర్టు కార్యాలయంలో విధులు నిర్వహించే ఓ మహిళా ఉద్యోగి ఐడీతో ముగ్గురి మహిళల పాస్పోర్టు దరఖాస్తుల ఫైళ్లకు సంబంధించి పాస్వర్డ్ను చోరీ చేసి వారి అప్లికేషన్లను క్లియర్ చేశాడు. దీనిపై ఫిర్యాదు అందుకున్న పోలీసులు.. ముమ్మరంగా దర్యాప్తు నిర్వహించారు. ఐపీ అడ్రెస్ ద్వారా నిందితుడిని గుర్తించారు. హ్యాకింగ్ చేసి ఫైళ్లను క్లియర్ చేసినట్లు పోలీసులు తేల్చారు. రాజాబాబును అదుపులోకి తీసుకొని విచారించగా నేరాన్ని అంగీకరించాడు.
