ఉత్తరప్రదేశ్‌ మాజీ సీఎం, భాజపా సీనియర్ నేత కల్యాణ్సింగ్(89) కన్నుమూశారు. తీవ్ర అనారోగ్య సమస్యలతో గత కొన్నాళ్లుగా బాధపడుతున్న ఆయన.. లఖ్‌నవూలోని సంజయ్‌గాంధీ ఆస్పత్రిలో చికిత్స పొందుతూ శనివారం రాత్రి తుదిశ్వాస(Kalyan Singh news) విడిచారు.
దేశ రాజకీయాల్లో కల్యాణ్సింగ్ది కీలక పాత్ర. ఉత్తరప్రదేశ్‌కు రెండుసార్లు ముఖ్యమంత్రిగా ఆయన పనిచేశారు. అటు రాజస్థాన్ గవర్నర్గానూ సేవలందించారు. భారతీయ జనతా పార్టీలో కీలకమైన నేతగా ఎదిగారు. 1992లో బాబ్రీ మసీదు ఘటన సమయంలో యూపీ సీఎంగా ఉన్నది ఆయనే. రెండుసార్లు పార్లమెంటు సభ్యుడిగానూ ఎన్నికయ్యారు.
కల్యాణ్సింగ్ మృతిపట్ల ప్రధాని మోదీ తీవ్ర విచారం వ్యక్తం చేశారు. కల్యాణ్ సింగ్ గొప్ప రాజనీతిజ్ఞుడు మాత్రమే గాక మంచి అడ్మినిస్ట్రేటర్ అని కొనియాడారు. క్షేత్రస్థాయి రాజకీయాల్లో ఆయన తనదైన ముద్ర వేసినట్లు తెలిపారు. ఉత్తర్ప్రదేశ్ అభివృద్ధి ప్రస్థానంలో కల్యాణ్ సింగ్ది కీలక పాత్ర అని పేర్కొన్నారు. సమాజంలో అణగారిన వర్గాల ప్రజలకు ఆయన గొంతుకగా నిలిచినట్లు కొనియాడారు. రైతులు, యువకులు,మహిళల సాధికారత కోసం ఆయన కృషి చేసినట్లు మోదీ వివరించారు.
కల్యాణ్ సింగ్ మరణవార్త పట్ల ఉపరాష్ట్రపతి దిగ్భ్రాంతి వ్యక్తం చేశారు. దేశం ఓ గొప్పనాయకుడిని, జాతీయవాదిని కోల్పోయిందని అన్నారు. ప్రజాసేవకు అంకితమైన వ్యక్తిగా కల్యాణ్సింగ్ను అభివర్ణించారు వెంకయ్య. వారి కుటుంబసభ్యులకు ప్రగాఢ సానుభూతి తెలియజేస్తున్నట్లు పేర్కొన్నారు.
23న అంత్యక్రియలు..
శనివారం రాత్రి తుదిశ్వాస విడిచిన కల్యాణ్ సింగ్ అంత్యక్రియలు ఈ నెల 23న ఉత్తర్ప్రదేశ్ నరోరాలోని గంగా నదీ ఒడ్డున జరగనున్నాయి. ఈ విషయాన్ని ఆ రాష్ట్ర ముఖ్యమంత్రి యోగి ఆదిత్యనాథ్ ప్రకటించారు. మూడు రోజుల పాటు సంతాప దినాలు పాటించనున్నట్టు, ఆగస్టు 23న సెలవు దినంగా ప్రకటించారు యోగి.
