తమిళనాడు చెందిన ఓ మహిళకు వింత సమస్య ఎదురైంది. ఆమె వయస్సు 41 సంవత్సరాలు.. కానీ అధికారుల నిర్లక్ష్యం కారణంగా ఆధార్ కార్డ్లో ఆమె వయసు 123 ఏళ్లుగా పడింది. దీంతో ఆమె ఏ ప్రభుత్వ పథకానికీ అర్హత పొందలేకపోతుంది. గత కొన్నేళ్లుగా తన ఆధార్ కార్డులో పుట్టిన సంవత్సరాన్ని మార్చేందుకు ప్రయత్నించి విఫలమైంది మహిళ. చివరికి చేసేదేమీ లేక బాధిత మహిళ.. తన సమస్యను పరిష్కరించాలంటూ జిల్లా కలెక్టర్ కార్యాలయంలో పిటిషన్ దాఖలు చేసింది.
తిరుచ్చి జిల్లాలోని దయానుర్ ప్రాంతానికి చెందిన కవిత అనే మహిళ 1982లో జన్మించింది. అయితే కవిత ఆధార్లో మాత్రం 1900లో జన్మించినట్లు ఉంది. ప్రస్తుతం కవిత వయస్సు 41 సంవత్సరాలు కాగా.. ఆధార్ ప్రకారం 123 ఏళ్లు. ఇటీవల కాలంలో కేంద్ర, రాష్ట్ర ప్రభుత్వాలు ప్రతి పథకానికి ఆధార్తో అనుసంధానం చేస్తున్నాయి. అయితే కవిత ఏదైనా పథకానికి అప్లై చేసుకున్నప్పుడు అధికారులు ఈ తప్పిదాన్ని గుర్తించి.. ఆధార్లో ఆమె వయసును సరిచేసుకుని రావాలని కోరేవారు. ఆధార్లో తలెత్తిన ఈ చిన్న తప్పిదం కారణంగా ఆమెకు అన్ని అర్హతలు ఉన్నా సరే.. ప్రభుత్వ పథకాలకు అనర్హురాలుగా మారింది.
కవిత గత కొన్నేళ్లుగా తన ఆధార్లో పుట్టిన సంవత్సరాన్ని మార్చేందుకు అనేక ఆధార్ కేంద్రాలకు వెళ్లింది. అక్కడ అధికారులు ప్రభుత్వ నిబంధనల ప్రకారం ఆధార్లో వయస్సను మార్చాలంటే.. బర్త్ సర్టిఫికేట్, ఎడ్యుకేషన్ సర్టిఫికేట్స్ అవసరం అని చెప్పారు. ఈ పత్రాలులేవి తన వద్ద లేనందున.. కవిత ప్రయత్నాలన్నీ విఫలమయ్యాయి. ఓటరు గుర్తింపు కార్డు మాత్రమే తనకు ఉన్న ఏకైక ఆధారమని కవిత వారివద్ద వాపోయింది. అయినా సరే ఓటర్ ఐడీనీ ఆధారంగా చేసుకుని పుట్టిన సంవత్సరాన్ని మార్చలేమని అధికారులు తేల్చి చెప్పారు. దీంతో ఇన్నాళ్లుగా ప్రభుత్వం నుంచి ఏ సహాయం అందలేదని ఆమె తన ఆవేదన వ్యక్తం చేసింది. ఈ సమస్యతో తాను తీవ్రంగా నష్టపోయానని ఆమె తెలిపింది. దిక్కుతోచని స్థితిలో ఉన్న ఆమె తన సమస్యను వీలైనంత త్వరగా పరిష్కరించాలంటూ కలెక్టర్ కార్యాలయంలో సోమవారం పిటిషన్ దాఖలు చేసింది.
ఆధార్, రేషన్ కార్డుల్లో తలెత్తిన ఇలాంటి చిన్న చిన్న లోపాలు కారణంగా గత కొన్నేళ్లుగా అక్కడక్కడా కొందరికి ఇటువంటి సమస్యలు ఎదురవుతూనే ఉన్నాయి. తాజాగా ఇలాంటి ఘటనే బంగాల్లో వెలుగుచూసింది. రేషన్ కార్డులో వివరాలు పొందుపరిచే సమయంలో అధికారుల నిర్లక్ష్యం కారణంగా ఓ కూర్రాడు తన తండ్రి కంటే వయస్సులో పెద్దవాడు అయ్యాడు. వాస్తవానికి అతని 14 సంవత్సరాలు కాగా.. రేషన్ కార్డులో మాత్రం 133 ఏళ్లు అని ముద్రించారు. దీంతో ఆ కుటుంబం వింత సమస్యలు ఎదుర్కొంది. ఆ వింత సమస్యలు ఏంటో.. వారి కథేంటో తెలుసుకోవాలంటే ఇక్కడ క్లిక్ చేయండి.
