Referral racket: ఆరోగ్య రంగంలో భారత్ గ్లోబల్ లీడర్గా అవతరించనుందనే మాట వినిపిస్తోంది. కరోనా సమయంలో ప్రపంచానికి వ్యాక్సిన్లు అందించి.. ఆ దిశగా ముందడుగు వేసింది. అయితే, క్షేత్రస్థాయిలో ముఖ్యంగా గిరిజన ప్రాంతాల్లో పరిస్థితులు భిన్నంగా ఉన్నాయి. ఛత్తీస్గఢ్లో పరిస్థితులు దుర్భరంగా మారాయి. ప్రభుత్వ ఆసుపత్రులకు వచ్చిన రోగులను.. ప్రైవేటు ఆసుపత్రులకు పంపించి వారి ఉసురు తీస్తున్న తీరు తాజాగా వెలుగు చూసింది. ఆ రాష్ట్ర గిరిజన మంత్రిత్వ శాఖ గణాంకాల ప్రకారం గిరిజన ప్రభావిత జిల్లాల్లో.. గడిచిన మూడేళ్లలో 3112 మంది (995 మంది గర్భిణులు) మహిళలు మరణించారు.
ఈ అంశంపై ఈటీవీ భారత్ చేసిన పరిశీలినలో విస్తుపోయే నిజాలు వెలుగు చూశాయి. చికిత్స కోసం ప్రభుత్వ ఆసుపత్రులకు వస్తున్న గిరిజన ప్రాంతాల ప్రజలను లైసెన్స్లు లేని ప్రైవేటు ఆసుపత్రులకు పంపిస్తున్న సిఫార్సుల రాకెట్ గుట్టు బయటపడింది. ఇలా.. పంపించిన వారిలో చాలా మంది మహిళలు సరైన చికిత్స అందక, తప్పుడు వైద్యం వంటి కారణంగా ప్రాణాలు కోల్పోయినట్లు తేలింది. ప్రభుత్వం ఎలాంటి చర్యలు తీసుకోకపోవటంతో ఈ మాఫియా రాజ్యమేలుతోంది.
22 లైసెన్స్ లేని ఆసుపత్రులు..
కోర్బా జిల్లాలోని గీతా దేవి మెమోరియల్ ఆసుపత్రిలో సుని బాయ్ కోర్వా అనే మహిళ ప్రాణాలు కోల్పోయిన క్రమంలో ఈ విషయాలు వెలుగులోకి వచ్చాయి. ప్రభుత్వ ఆసుపత్రిలో పని చేస్తున్న ఓ డాక్టర్ దానిని నిర్వహిస్తున్నాడు. బాధిత మహిళను చికిత్స పేరుతో మూడు రోజులు ఆసుపత్రిలోనే ఉంచటం ద్వారా మృతి చెందింది. ఆమె మరణించిన క్రమంలో ఆసుపత్రిని మూసివేశారు అధికారులు. సంబంధిత వైద్యుడికి నోటీసులు పంపించారు. అయితే.. ఇది కేవలం చిన్న మంచు తునక లాంటిది. ఇలాంటివి ఆయా జిల్లాల్లో భారీగా జరుగుతున్నట్లు తెలుస్తోంది. గిరిజన ప్రభావిత జిల్లాలైన బలరామ్పుర్, బస్తర్, బీజాపుర్, దంతెవాడ, జాష్పుర్, కంకెరన్, కొండగావూన్, కోబ్రా, కొరియా, నారాయణ్పుర్, సుక్మా, సురాజ్పుర్, సుర్గుజా జిల్లాల్లో సుమారు 22 లైసెన్స్ లేని ఆసుపత్రులను నడుపుతున్నారు. అందులో చాలా వరకు ప్రభుత్వ ఆసుపత్రుల్లో వైద్యులుగా చేస్తున్నవారి చేతిలో ఉండటం గమనార్హం.
ఏజెంట్లు, ప్రభుత్వ ఆసుపత్రుల్లోని వార్డ్ బాయ్స్, ఇతర సిబ్బంది సాయంతో.. వారిని ప్రైవేటు ఆసుపత్రికి వచ్చేలా మభ్యపెడుతున్నట్లు పరిశీలనలో తేలింది. అందుకోసం వారికి కమీషన్ ఇస్తుంటారు డాక్టర్లు. ఆయా ఆసుపత్రుల్లో సరైన వైద్య సామగ్రి, నైపుణ్యవంతులైన సిబ్బంది లేకపోవటం కారణంగా మరణాలు సంభవిస్తున్నట్లు తెలుస్తోంది.
"ఎవరైనా తీవ్ర అనారోగ్య కారణాలతో మరణిస్తే అర్థం చేసుకోగలం. కానీ, సాధారణ రోగాలతో ప్రాణాలు కోల్పోతున్నారంటే అది వైద్యుల నిర్లక్ష్యం కారణంగానే అని భావించాల్సి ఉంటుంది. ఇది చాలా తీవ్రమైన అంశం. "
- నూతన్ సింగ్ ఠాకూర్, అడ్వకేట్.
గడిచిన మూడేళ్లలో.. ఒక్క దంతెవాడ జిల్లాలోనే 1753 మరణాలు నమోదయ్యాయి. కోర్బాలో 103 మంది మహిళలు ప్రాణాలు కోల్పోయారు. అయితే, మరణాలకు కారణం గర్భస్రావం, రోగనిరోధక వ్యవస్థ పాడవటం వంటిని రికార్డుల్లో ఉండటం గమనార్హం. మహిళల మరణాలపై దర్యాప్తు చేసేందుకు వచ్చిన కేంద్ర ప్రభుత్వ సంయుక్త కార్యదర్శి రఘురాజ్ మాధవ్ రాజేంద్రన్ను సంప్రదించగా.. స్పందించేందుకు నిరాకరించారు. 'ప్రభుత్వం ఏర్పాటు చేసిన మౌలిక వసతులను పరిశీలించేందుకు వచ్చాను. ప్రభుత్వ ఆరోగ్య పథకాల అమలును తెలుసుకుంటున్నాను. అంతకు మించి వేరే మాట్లాడదలుచుకోలేదు' అని సమాధానమిచ్చారు.
ఇదీ చూడండి: దేశంలో ఉగ్రదాడికి భారీ కుట్ర.. 28మంది అనుమానితుల అరెస్ట్
