primary school teacher assets: ప్రభుత్వ ప్రాథమిక పాఠశాల ఉపాధ్యాయుడికి జీతం గరిష్ఠంగా రూ.50వేల వరకు ఉండొచ్చు. అదీ రిటైర్మెంట్కు సమీపంలో ఉన్నవారికి ఆ మాత్రం వస్తుందేమో. మరికొందరు చిన్నాచితకా వ్యాపారాలు చేస్తూ అదనంగా సంపాదిస్తుంటారు. అయితే, లక్షల రూపాయలు తెచ్చిపెట్టే వ్యాపారాలు చేస్తూ ఉపాధ్యాయుడిగా కొనసాగటం చూశారా? ఓ ఉపాధ్యాయుడు 20 కళాశాలలకు యజమాని అంటే నమ్ముతారా? అవునండీ అది నిజమే. ఈ సంఘటన మధ్యప్రదేశ్లో వెలుగు చూసింది.
మధ్యప్రదేశ్ గ్వాలియర్కు చెందిన ఆర్థిక నేరాల విభాగం(ఈఓడబ్ల్యూ) అధికారులు ఘతిగావ్లోని ప్రభుత్వ పాఠశాల ఉపాధ్యాయుడు ప్రశాంత్ పర్మార్ ఇల్లు, ఇతర ప్రాంతాల్లో శనివారం దాడులు చేశారు. ఆయనకు లెక్కకు మించిన ఆస్తులు ఉండటం, 20 కళాశాలలకు యజమానిగా గుర్తించి ఆశ్చర్యపోయారు.
"గ్వాలియర్ సహా ఇతర ప్రాంతాల్లో దాడులు నిర్వహించగా.. డీఈడీ, బీఈడీ కోర్సులు అందించే 20 కళాశాలలకు పర్మార్ ఓనర్ అని ప్రాథమిక విచారణలో తెలిసింది. అవి గ్వాలియర్- ఛంబల్ డివిజన్లో ఉన్నాయి. ఆ కాలేజీలకు సంబంధించిన డాక్యుమెంట్లపై దర్యాప్తు చేస్తున్నాం. ఆయన ఆస్తులు లెక్కలో చూపిన వాటితో పోలిస్తే 1000 రెట్లు ఎక్కువగా ఉంటాయి. అతనికి నాలుగు సొంత కార్యాలయాలు ఉన్నాయి. దాడులు కొనసాగుతున్నాయి. టీచర్కు సంబంధించిన ఆస్తులపై పూర్తి వివరాలను సేకరిస్తాం."
- సతీశ్ చతుర్వేది, ఈఓడబ్ల్యూ డిప్యూటీ సూపరింటెండెంట్ ఆఫ్ పోలీస్.
