Bhima Koregaon case: భీమా-కోరెగావ్ కేసులో నిందితురాలు, న్యాయవాది, సామాజిక కార్యకర్త సుధా భరద్వాజ్ మూడేళ్ల తర్వాత జైలు నుంచి గురువారం విడుదలయ్యారు. ఈ కేసులో ఆరోపణలు ఎదుర్కొంటున్న ఆమె ముంబయిలోని జైలులో విచారణ ఖైదీగా ఉన్నారు.
కేంద్ర ప్రభుత్వాన్ని కూలదోయాలని కుట్ర పన్నారన్న ఆరోపణల కేసులో శిక్ష అనుభవిస్తున్న భరద్వాజ్కు 2021, డిసెంబర్ 1న బాంబే హైకోర్టు డీఫాల్ట్ బెయిల్ మంజూరు చేసింది. డిసెంబర్ 8న బెయిల్ ఆంక్షలు, విడుదల తేదీని నిర్ణయించాలని ప్రత్యేక ఎన్ఐఏ కోర్టును ఆదేశించింది. హైకోర్టు ఆదేశాల మేరకు విచారించిన ఎన్ఐఏ కోర్టు రూ.50వేల పూచీకత్తుతో విడుదల చేసేందుకు ఆదేశించింది.
కోర్టు ఆదేశాలు అందిన తర్వాత.. అన్ని లాంఛనాలు పూర్తి చేసుకుని గురువారం మధ్యాహ్నం బైకుల్లా మహిళా జైలు నుంచి బయటకు వచ్చారు సుధా భరద్వాజ్. ఆమె కోసం వేచి ఉన్న మీడియాతో మాట్లాడకుండానే కారులో వెళ్లిపోయారు.
ఇదీ కేసు..
2017, డిసెంబర్ 31న పుణె షానివార్వాడాలోని ఎల్గర్ పరిషద్ కాన్క్లేవ్ వద్ద చేసిన రెచ్చగొట్టే ప్రసంగాలతో.. ఆ తర్వాతి రోజును భీమా కోరాగావ్ వార్ మెమోరియల్ వద్ద హింసాత్మక ఘటనలు జరిగాయని పోలీసులు ఆరోపించారు. ఈ కేసులో భాగంగా సుధా భరద్వాజ్తో పాటు పలువురు హక్కుల నేతలపై కేసు నమోదు చేశారు. ఈ కేసులో విచారణ చేపట్టిన పుణె పోలుసు.. వీరి వెనక మావోయిస్టులు ఉన్నట్లు పేర్కొన్నారు. ఆ తర్వాత కేసును జాతీయ దర్యాప్తు సంస్థ (ఎన్ఐఏ)కు అప్పగించారు. చట్ట వ్యతిరేక చర్యల నిరోధక చట్టం(యూఏపీఏ) కింద 2018, ఆగస్టులో భరద్వాజ్ను అరెస్ట్ చేసింది ఎన్ఐఏ. తమకు తెలియకుండా ముంబయిని వదిలి వెళ్లొద్దని, పాస్పోర్ట్ అప్పగించాలని, ఈ కేసుకు సంబంధించి మీడియాతో మాట్లాడొద్దని ఆంక్షలు విధించింది.
హైకోర్టు డీఫాల్ట్ బెయిల్ మంజూరు చేసిన క్రమంలో సుప్రీం కోర్టును ఆశ్రయించింది ఎన్ఐఏ. అయితే, దర్యాప్తు సంస్థ పిటిషన్ను సర్వోన్నత న్యాయస్థానం తిరస్కరించింది. భరద్వాజ్కు బెయిల్ అర్హురాలని, అందుకు నిరాకరించటం ఆమె ప్రాథమిక హక్కులను ఉల్లంఘించటమేనని హైకోర్టు పేర్కొంది.
మిగతా వారికి నో..
భీమా-కొరేగావ్ కేసులో అరెస్టైన 16 మంది నిందితుల్లో డీఫాల్ట్ బెయిల్ పొందిన వారిలో సుధా భరద్వాజ్ తొలి వ్యక్తి. మరో ఎనిమిది మంది బెయిల్ పిటిషన్ను హైకోర్టు తిరస్కరించింది. కవి, సామాజిక కార్యకర్త వరవరరావు ప్రస్తుతం మెడికల్ బెయిల్లో ఉన్నారు. మరో నిందితుడు హక్కుల నేత స్టాన్ స్వామి మెడికల్ బెయిల్ కోసం ఎదురుచూస్తున్న క్రమంలో అనారోగ్యంతో ప్రైవేట్ ఆస్పత్రిలో చికిత్స పొందుతూ జులై 5న మరణించారు. మిగతా వాళ్లంతా ప్రస్తుతం విచారణ ఖైదీలుగా కస్టడీలో ఉన్నారు.
ఇదీ చూడండి: భీమా-కోరెగావ్ కేసులో సుధా భరద్వాజ్కు బెయిల్
