DGCA Boeing 737: చైనాలో జరిగిన విమాన ప్రమాదం దేశంలోని విమాయాన సంస్థల్లో కలకలం రేపింది. ప్రమాదానికి గురైన బోయింగ్ 737 రకానికి చెందిన విమానాలతోనే చాలా సంస్థలు సేవలు అందిస్తున్నాయి. ఈ నేపథ్యంలో వీటిపై నిఘా పెంచాలని డైరెక్టర్ జనరల్ ఆఫ్ సివిల్ ఏవియేషన్ నిర్ణయించింది. ప్రస్తుతం దేశంలో స్పైస్జెట్, విస్తారా, ఎయిర్ఇండియా ఎక్స్ప్రెస్లు బోయింగ్ 737 విమానాలతో సేవలు అందిస్తున్నాయని అధికారులు వెల్లడించారు.
ఒకప్పుడు నిషేధించినవే..
కొంతకాలం క్రితం డీజీసీఏ బోయింగ్ 737 మ్యాక్స్ విమానాలపై నిషేధం విధించింది. అక్టోబరు 2018 నుంచి మార్చి 2019 మధ్య జరిగిన విమాన ప్రమాదాల నేపథ్యంలో ఈ నిర్ణయం తీసుకుంది. ఆ సమయంలో 346 మంది ప్రాణాలు కోల్పోయారు. డీజీసీఏ ఆదేశాల మేరకు విమానాల సాంకేతికతలో మార్పులు చేశాక గతేడాది ఆగస్టులో ఈ విమానాలపై నిషేధం తొలగించింది.
అయితే.. బోయింగ్ 737 విమానాలపై నిఘా పెడతామన్న డీజీసీఏ నిర్ణయంపై ఆ రకం విమానాలతో సేవలు అందిస్తున్న స్పైస్జెట్, విస్తారా, ఎయిర్ఇండియాలు స్పందించాల్సి ఉంది.
చైనాలో 132 మందితో వెళ్తున్న ప్రయాణికుల విమానం గువాంగ్షీ రాష్ట్రం, వూఝౌ నగర సమీపంలోని పర్వత ప్రాంతంలో కూలిపోయింది. చైనా ఈస్టర్ ఎయిర్లైన్స్కు చెందిన బోయింగ్ 737 విమానం.. కున్మింగ్ నుంచి గువాంగ్ ఝౌకు వెళుతుండగా ఈ ప్రమాదం జరిగినట్లు ప్రాంతీయ విపత్తు స్పందన విభాగం వెల్లడించింది.
ఇదీ చూడండి : మున్సిపల్ ట్రక్కు బీభత్సం.. బాలిక బలి
