వ్యవసాయ చట్టాలకు వ్యతిరేకంగా దిల్లీలో రైతుల నిరసనలు కొనసాగుతున్నాయి. కేంద్రం దిగొచ్చేంతవరకు దిల్లీలోనే ఉంటామని.. నిరసనలు కొనసాగిస్తామని తేల్చిచెప్పారు భారతీయ కిసాన్ యూనియన్ ప్రధాన కార్యదర్శి హరిందర్ సింగ్. దిల్లీ-హరియాణా సరిహద్దులోని సింఘూ వద్ద రైతులతో జరిగిన సమావేశం అనంతరం ఈ వ్యాఖ్యలు చేశారు.
కేంద్ర ప్రభుత్వంపై తమకు నమ్మకం లేదని రైతులు వెల్లడించారు. ఇంతకు ముందు కూడా చర్చలు జరిగాయని.. కానీ ఎలాంటి ఫలితం దక్కలేదన్నారు. కొత్త చట్టాలను ప్రభుత్వం వెనక్కి తీసుకోవాలని డిమాండ్ చేశారు.
మరోవైపు రైతుల ఆందోళనలతో దిల్లీలో జనజీవన కార్యకలాపాలు దెబ్బతిన్నాయి. నిరసనల వల్ల సింఘూ, టిక్రి సరిహద్దులను మూసివేశారు దిల్లీ పోలీసులు. దీంతో ట్రాఫిక్కు తీవ్ర అంతరాయం ఏర్పడింది.
దేశరాజధానికి రైతుల తాకిడి గంటగంటకూ పెరుగుతోంది. తాజాగా.. 'దిల్లీ ఛలో'లో పాల్గొనేందుకు భారీ సంఖ్యలో రైతులు ట్రాక్టర్లు, బస్సుల్లో దిల్లీకి బయలుదేరారు. శంభూ వద్ద పంజాబ్-హరియాణా సరిహద్దును దాటారు.
'నిరసనల్లో మా రైతులు లేరు'
'దిల్లీ ఛలో'లో తమ రాష్ట్ర అన్నదాతలు పాల్గొనలేదని హరియాణా ముఖ్యమంత్రి మనోహర్ లాల్ ఖట్టర్ తేల్చిచెప్పారు. అదే సమయంలో.. కొన్ని రాజకీయ పార్టీలు, సంఘాలు వెనుక నుంచి నిరసనలను నడిపిస్తున్నాయని ఆరోపించారు.
"ఈ ఉద్యమాన్ని పంజాబ్ రైతులు ప్రారంభించారు. కానీ దీనితో కొన్ని రాజకీయ పార్టీలు, సంఘాలకు సంబంధం ఉంది. హరియాణా రైతులు ఇందులో పాల్గొనలేదు. అందుకు నేను సంతోషంగా ఉన్నా. వారందరికీ నా అభినందనలు."
--- మనోహర్ లాల్ ఖట్టర్, హరియాణా సీఎం.
రైతుల ఆందోళనలకు కారణం పంజాబ్ ముఖ్యమంత్రి అమరీందర్ సింగ్ అని మండిపడ్డారు ఖట్టర్. అమరీందర్ను సంప్రదించడానికి ప్రయత్నిస్తున్నప్పటికీ ఆయన అందుబాటులోకి రావడం లేదని పేర్కొన్నారు.
రైతుల నిరసనలతో ఖలిస్థాన్ వేర్పాటువాదులకు సంబంధం ఉన్నట్టు వస్తున్న వార్తలకు మద్దతుగా కీలక వ్యాఖ్యలు చేశారు ఖట్టర్. ఆందోళనల్లో అవాంఛనీయ అంశాలున్నట్టు తమకు సమాచారం ఉందని.. త్వరలోనే వాటిని బయటపెడతామన్నారు.
ఇదీ చూడండి:- ఆ 8 రాష్ట్రాల్లోనే మహమ్మారి వ్యాప్తి అధికం
