ఓటీటీల నియంత్రణపై కేంద్రం అఫిడవిట్​

ఓటీటీ​ల నియంత్రణపై సుప్రీంకోర్టులో కేంద్ర ప్రభుత్వం అఫిడవిట్​ దాఖలు చేసింది. కొత్త నిబంధనల ప్రకారం అభ్యంతరకరమైన కంటెంట్‌ను ప్రభుత్వం నిషేధిస్తుందని అందులో పేర్కొంది.

ఓటీటీ ప్లాట్‌ఫామ్​ల నియంత్రణపై సుప్రీంకోర్టులో కేంద్ర ప్రభుత్వం అఫిడవిట్ దాఖలు చేసింది. నూతన నిబంధనల ప్రకారం నెట్‌ఫ్లిక్స్, అమెజాన్ ప్రైమ్ వంటి సంస్థల కంటెంట్​ను పర్యవేక్షిస్తున్నట్లు సమాచార, ప్రసార మంత్రిత్వ శాఖ తెలిపింది.

చట్ట సభ్యులు, మేధావుల నుంచి ఓటీటీ ప్లాట్‌ఫామ్​ గురించి తమకు చాలా ఫిర్యాదులు వచ్చాయని పేర్కొంది. వాటిని పరిశీలించిన తర్వాత, ఈ ఏడాది ఓటీటీ ప్లాట్‌ఫామ్​ కంటెంట్‌ను పర్యవేక్షించడానికి ఇన్ఫర్మేషన్ టెక్నాలజీ రూల్స్-2021ను(ఇంటర్మీడియరీ గైడ్​లైన్స్​, డిజిటల్ మీడియా ఎథిక్స్ కోడ్) ప్రవేశపెట్టామని కేంద్రం వెల్లడించింది. ఈ చట్టంలోని 67,67ఎ, 67 బి సెక్షన్ల కింద అభ్యంతరకరమైన కంటెంట్‌ను ప్రభుత్వం నిషేధిస్తుందని అఫిడవిట్​లో పేర్కొంది.

ఓటీటీ ప్లాట్‌ఫామ్​లో కంటెంట్​ అంశంపై శశాంక్ శేఖర్ సుప్రీంకోర్టులో పిటిషన్ దాఖలు చేశారు. విచారణ సందర్భంగా ఓటీటీ ప్లాట్‌ఫామ్​ల నియంత్రణపై తీసుకున్న చర్యల వివరాలతో అఫిడవిట్​ దాఖలు చేయాలని గతంలో కేంద్రాన్ని సుప్రీంకోర్టు ఆదేశించింది.

ఇదీ చూడండి: ఆ క్రమబద్ధీకరణ నిబంధనలు చట్టబద్ధమేనా?