కరోనా వైరస్ కొత్త స్ట్రెయిన్​ కథేంటి?

బ్రిటన్​లో వెలుగుచూసిన కొత్త రకం కరోనా వైరస్​.. ప్రపంచ దేశాలను కలవరపెడుతోంది. దీనిపై సరైన వివరాలు లేకపోవడం ప్రజలను ఆందోళనకు గురిచేస్తోంది. అసలు ఈ అనూహ్య మార్పు ఏంటి? వైరస్​లో కొత్త రకం ఎందుకు వచ్చింది? ఎలా వచ్చింది? దీని ప్రభావమెంత?

కరోనా వ్యాక్సిన్ల అత్యవసర వినియోగంతో ఊపిరి పీల్చుకుంటున్న ప్రపంచ దేశాల మీద 'కొత్త రకం' వైరస్​ వార్త పిడుగులా పడింది. కరోనా సృష్టించిన బీభత్సం నుంచి ఇప్పుడిప్పుడే కోలుకుంటున్న ప్రపంచ దేశాల ప్రజలు.. బ్రిటన్​లో వెలుగుచూసిన ఈ కరోనా వైరస్​ కొత్త స్ట్రెయిన్​పై ఆందోళన చెందుతున్నారు. అయితే.. అసలు ఏంటి ఈ కొత్త స్ట్రెయిన్​? దీని ప్రభావమెంత? భయపడాల్సిన అవసరం ఉందా? ఈ ప్రశ్నలకు సమాధానం.. ఆంధ్రప్రదేశ్​ కొవిడ్​ నోడల్​ అధికారి, ప్రొఫెసర్​ డా. రాంబాబు మాటల్లో..

• ఈ స్ట్రైయిన్​ని వీయూఐ 202012/01 అని పిలుస్తారు. వీయూఐ అంటే వేరియంట్ అండర్ ఇన్వెస్టిగేషన్. ఇది కొత్త వేరియంట్ మాత్రమే. కొత్త వైరస్ కాదు.
• వైరస్ పరిణామంలో అనేక జన్యుమార్పిళ్లు జరుగుతాయి. ఈ జన్యుమార్పిళ్లలో కొన్ని బాగా ప్రభావవంతమైనవి వచ్చే అవకాశం ఉంటుంది. అందులో.. ఈ మార్పు బాగా ప్రభావితమైనది అని తెలుస్తోంది.
• ఈ కొత్త వేరియంట్లలో సుమారుగా 17 వరకు జన్యుమార్పిళ్లు ఉన్నాయని గుర్తించారు.
• అందులో అన్నిటికన్నా ముఖ్యమైనది ఎన్​501వై. దీనికి అర్థం.. 501 పొజిషన్లో ఆస్పర్జిన్ అనే అమినోయాసిడ్ మారిపోయి.. టైరోసీన్ అనే అమినోయాసిడ్ ఉండటం.
• ఈ మ్యుటేషన్ వల్ల ఈ వైరస్ ఎక్కువగా వ్యాప్తి చెందే అవకాశం ఉందని తెలుస్తోంది. ఇది సుమారుగా 70శాతం ఎక్కువగా వ్యాప్తి చెందొచ్చు.
• ఈ మ్యుటేషన్.. స్పైక్ ప్రోటీన్​లోని రిసెప్టార్స్ బైండింగ్ ప్రోటీన్​లో ఉంది. దీని వల్ల వైరస్ మనిషి కణజాలంలోని ఏసీఈ-2 అనే రిసెప్టార్స్​కు ఎక్కువగా అంటుకునే ప్రమాదం ఉంది.
• ఈ మ్యుటేషన్​తో పాటు 69/70 ప్రాంతంలో అమినోయాసిడ్ డిలీషన్స్ కూడా కనపడ్డాయి. వీటిని డెల్టా హెచ్ 69, డెల్టా వి 70 అని పిలుస్తారు. ఈ మ్యుటేషన్స్ వల్ల ఈ వైరస్.. రోగ నిరోధక శక్తి నుంచి తప్పించుకునే అవకాశం ఉంది.
• పీ681హెచ్​ అనే మరొక మ్యుటేషన్ కూడా ఈ వైరస్ వేరియంట్లో కనిపించింది.
• ఈ వేరియంట్​ను మొట్టమొదటిసారిగా బ్రిటన్​లో కనుక్కున్నారు. అయితే ఇది ఇప్పుడే డెన్మార్క్​లోనూ కనిపించటం విశేషం. దక్షిణాఫ్రికాలో మరొక వేరియంట్ కూడా వేగంగా వ్యాప్తి చెందుతోందని తెలుస్తోంది. దక్షిణాఫ్రికన్ వేరియంట్లో కూడా ఈ ఎన్​501వై మ్యుటేషన్ ఉందని సమాచారం.
• ఈ వేరియంట్ వల్ల కరోనా వైరస్​తో మరణాల సంఖ్య పెరిగే అవకాశం ఉన్నట్లుగా ఎలాంటి దాఖలాలు లేవు.
• ఈ వేరియంట్ వల్ల వ్యాక్సిన్ పనికి రాకుండా పోయే అవకాశం ఉన్నట్లుగా కూడా ఎలాంటి ఆధారం లేదు.
• అయితే ఈ వేరియంట్ బాగా వేగంగా వ్యాప్తి చెందడం వల్ల బ్రిటన్ కలవరపడుతోంది. ఇప్పటికే అక్కడ ఆంక్షలు బాగా పెంచారు. క్రిస్మస్ వేడుకలు కూడా తగ్గించుకోవాలని ప్రజలకు పిలుపునిచ్చారు. విమానాలను కూడా రద్దు చేశారు. యూకే నుంచి వచ్చే విమానాల్ని అనేక ఐరోపా దేశాలు రద్దు చేశాయి.
• ఏదేమైనప్పటికీ వైరస్ పరిణామక్రమంలో అనేక మార్పులు జరిగే అవకాశం ఉన్నందున ఈ వైరస్​ను ఎంత తొందరగా మనం నియంత్రించగలిగితే అంత మంచిది.

'భయపడాల్సిన పనిలేదు..'