బంధువుల సమక్షంలో వైభవంగా ఆ జంట పెళ్లి జరిగింది. నవదంపతులు ఉత్సాహంగా వివాహ బంధంలోకి అడుగుపెట్టారు. ఒకరినొకరు అర్థం చేసుకునేందుకు ఫస్ట్ నైట్ రోజున వారి జీవితాల్లో జరిగిన ఎన్నో సంఘటనలు, మంచి-చెడు గురించి చెప్పుకోసాగారు. ఈ క్రమంలో వధువు చెప్పిన ఓ చేదు నిజం అప్పటివరకు వారి మధ్య ఉన్న సంతోషాన్ని దూరం చేసింది. వారి బంధం ముగిసేలా చేసింది. ఈ ఘటన మధ్యప్రదేశ్లోని గ్వాలియర్లో జరిగింది.
ఇదీ జరిగింది..: తన జీవితంలోని పలు విషయాలను భర్తతో పంచుకుంటున్న యువతి.. గతంలో తనపై అత్యాచారం జరిగిందని వెల్లడించింది. ఈ మాటలకు షాక్ తిన్న భర్త మరుసటి రోజే యువతిని ఆమె పుట్టింట్లో విడిచిపెట్టేశాడు. బంధువులకు ఈ విషయం తెలిసి ఆశ్చర్యపోయారు. ఈ క్రమంలో యువతిపై అత్యాచారానికి పాల్పడింది ఆమె మేనమామ కొడుకని తెలిసింది. తమ వివాహాన్ని రద్దు చేయాలంటూ భర్త కోర్టును ఆశ్రయించాడు. మరోవైపు బాధితురాలు కూడా అత్యాచారానికి పాల్పడిన నిందితుడిపై ఫిర్యాదు చేసింది. యువకుడి పిటిషన్ మేరకు న్యాయస్థానం విచారణ చేపట్టింది. అయితే ఎన్నిసార్లు నోటీసులు పంపినా అతని భార్య కోర్టుకు హాజరుకాలేదు. ఇలా మూడేళ్ల పాటు సాగిన విచారణను ముగిస్తూ ఇటీవల కోర్టు తీర్పునిచ్చింది. యువకుడు కోరిన విధంగా 2019లో జరిగిన ఆ వివాహాన్ని రద్దు చేస్తున్నట్లు స్పష్టం చేసింది.
ఇదీ చూడండి : 'ఫ్రీ ఫైర్'కు బానిస.. అనుక్షణం అదే కలవరింపు.. గాల్లో గన్ పేల్చుతూ...
