శ్రీరామ జన్మభూమి తీర్థక్షేత్ర ట్రస్ట్.. ఆయోధ్య రామమందిరం భూమిపూజ అంశంలో అన్నింటికన్నా ఎక్కువగా వినిపిస్తోంది ఈ పేరే. మందిరానికి సంబంధించి అన్ని బాధ్యతలు చూసుకుంటోంది. కోర్టు తీర్పు వెలువడిన తర్వాత ఏర్పాటైన ఈ ట్రస్టు... ఆలయ నిర్మాణానికి సంకల్పించింది. దేశవ్యాప్తంగా ప్రస్తుతం ఎంతో ప్రాముఖ్యం సంతరించుకున్న ఈ ప్రతిష్ఠాత్మక నిర్మాణానికి ఎటువంటి ఇబ్బందులు తలెత్తకుండా.. సాధ్యమైనంత వేగంగా.. సుందరంగా రూపుదిద్దుకునేలా అన్ని జాగ్రత్తలు తీసుకుంటోంది. అయోధ్యలో అన్నీ తానై వ్యవహరిస్తున్న ఈ ట్రస్టు.. రామమందిరానికి సంబంధించి అన్న అంశాలకు జవాబుదారీ.
లోక్సభలో మోదీ ప్రకటన..
భారత ప్రభుత్వం ఏర్పాటు చేసినా స్వతంత్రంగా నడిచే ఈ ట్రస్టు.. కేవలం ఆయోధ్య రామమందిరం కోసమే ఏర్పడింది. ఏళ్లుగా తేలని అయోధ్య వివాదంపై సర్వోన్నత న్యాయస్థానం వెలువరించిన చారిత్రక తీర్పు తర్వాత రూపు దిద్దుకుంది. 15 మంది సభ్యులతో ఏర్పాటైంది. ఈ ట్రస్టును లోక్‌సభ వేదికగా ఈ ఏడాది ఫిబ్రవరి 5న ప్రధాని మోదీ స్వయంగా ప్రకటించారు.
సుప్రీంకోర్టు మార్గదర్శకాలకు అనుగుణంగా ట్రస్టు విధివిధానాలు రూపొందించారు. ప్రముఖ న్యాయవాది పరాశరన్ నేతృత్వంలో శ్రీరామ్ జన్మభూమి తీర్థ క్షేత్ర ట్రస్టు ఏర్పాటు చేశారు. దిల్లీలోని పరాశరన్ నివాసమే ట్రస్టు కార్యాలయమని నాడు కేంద్రం ప్రకటించింది.
వీరి ఆధ్వర్యంలోనే..
ఇక అప్పటి నుంచి ఈ ట్రస్టు ఆలయ నిర్మాణానికి సంబంధించిన అంశాల్లో అన్నీ తానై వ్యవహరిస్తోంది. 15 మంది సభ్యులతో ఏర్పాటైన ఈ ట్రస్టు.. ప్రస్తుతం మహంత్ నృత్య గోపాల్‌ దాస్ అధ్యక్షుడిగా ఆయన నేతృత్వంలో కార్యకలాపాలు నిర్వహిస్తోంది. అలాగే ఈ ట్రస్టుకు కోశాధికారిగా స్వామి గోవింద్‌ దేవ్‌ మహరాజ్‌ వ్యవహరిస్తుండగా.. శ్రీ చంపత్ రాయ్ ప్రధాన కార్యదర్శిగా ఉన్నారు. పరాశరన్ సీనియర్‌ న్యాయవాదిగా ఉండగా.. ఐఏఎస్ నృపేంద్ర మిశ్రా శాశ్వాత సభ్యులుగా ఉన్నారు.
వీరితో పాటు స్వామి వాసుదేవానంద్‌ సరస్వతిజీ మహరాజ్‌, స్వామి విశ్వప్రసన్నతీర్థజీ మహరాజ్‌, ప్రేమానంద్‌ గిరిజీ మహరాజ్‌, విమలేంద్ర మోహన్‌ ప్రతాప్‌ మిశ్రా, హోమియోపతి వైద్యులు అనిల్‌ మిశ్రా, కామేశ్వర చౌపల్‌, మహంత్ దేవేంద్రదాస్‌ సభ్యులుగా ఉన్నారు. కేంద్రం నుంచి హోం శాఖ అదనపు కార్యదర్శి జ్ఞానేశ్ కుమార్‌, యూపీ ప్రభుత్వం తరపున ఆదనపు ముఖ్యకార్యదర్శి అవనీష్ అవస్థీలతో పాటు స్థానిక పాలనాధికారి అంజూ ఝా ఉన్నారు. రామమందిరం నిర్మాణానికి సంబంధించిన అన్న కార్యకలాపాలు వీరి ఆధ్వర్యంలోనే జరగనున్నాయి.
పరాశరన్ పాత్ర కీలకం..
ఈ ట్రస్ట్‌కు మొదటి అధ్యక్షుడిగా వ్యవహరించారు న్యాయవాది పరాశరన్. 92 ఏళ్ల ఆయన ఆయోధ్య కేసులో కీలకంగా ఉన్నారు. ఏళ్లుగా నలుగుతున్న చారిత్రక అయోధ్య కేసు పరిష్కారానికి ఈయన వాదనలు వినిపించారు. సుప్రీంకోర్టులో 40 రోజుల పాటు జరిగిన విచారణలో ప్రతిరోజు ఈయన పాల్గొన్నారు. రామ్ లల్లా విరాజ్మన్‌కు తీర్పు అనుకూలంగా రావటంలో ఈయన ముఖ్య పాత్ర పోషించారు.
ఆ తర్వాత ఆయనే అధ్యక్షుడిగా ట్రస్ట్ ఏర్పాటు చేశారు. అనంతరం ఆయోధ్యకే చెందిన ప్రముఖ స్వామీజీ మహంత్ నృత్యగోపాల్‌ దాస్‌ను ట్రస్ట్ పెద్దగా నియమించారు. ఈయన ప్రస్తుతం అయోధ్యలోనే అతిపెద్ద ఆలయం మణి రాందాస్‌ కీ చవానీ- పీఠాధిపతిగా వ్యవహరిస్తున్నారు. అంతకుముందు రామ్ జన్మభూమి న్యాస్‌ ట్రస్ట్‌కు అధిపతిగా ఉన్నారు. రామమందిరం నిర్మాణానికి నాటి నుంచే పోరాడుతున్నారు.
ఇప్పటివరకు చేసిన పనులివే..
ట్రస్టు ఏర్పాటైన తర్వాత వీరు చేసిన మొదటి పని ఆలయం నిర్మాణానికి సంబంధించిన నమూనా రూపొందించటం. అంతకుముందే అనుకున్న ఆకృతికి మరిన్ని మెరుగులు దిద్దింది. మందిరం ఎత్తు మరింత పెంచింది. ప్రభుత్వానికి ఎప్పటికప్పుడు నివేదికలు పంపించింది. భూమి చదును చేసే కార్యక్రమాలు లాక్‌డౌన్‌కు ముందే చేపట్టింది. లాక్‌డౌన్‌ సమయంలో పనులు నిలిచిపోయినా భూసార పరీక్షల కోసం నమూనాలు సేకరించి లార్సెన్ అండ్ టుబ్రో, టెంపుల్ ఫౌండేషన్ డ్రాయింగ్ కూడా చేపట్టింది. డ్రాయింగ్ ఆధారంగానే నిర్మాణం ఉంటుందని శ్రీరామ్ జన్మభూమి తీర్థ క్షేత్ర ట్రస్టు ప్రధాన కార్యదర్శి చంపత్ రాయ్ ఆనాడే చెప్పారు.
నిధుల సేకరణ..
ప్రధాన శిల్పి సోంపురాతో కలిసి నిర్మాణ నమూనాను ఓ కొలిక్కి తీసుకొచ్చిన తర్వాత.. ప్రభుత్వ అనుమతితో నిధుల సేకరణపై ప్రధాన దృష్టి సారించారు. వర్షాకాలం పూర్తయి పరిస్థితులు చక్కబడగానే నిధుల సేకరణ చేపడతామని ట్రస్టు మొదట్లోనే చెప్పింది. సేకరణ అధికారికంగా చేపట్టటానికి ముందే దేశవ్యాప్తంగా పలు ధార్మిక సంస్థలు ఆలయ నిర్మాణానికి తమవంతుగా నిధులు ప్రకటించాయి. అధికారిక వైబ్‌సైట్‌ నుంచి ఇప్పటికే ఈ ట్రస్టు నిధుల సేకరణ మొదలు పెట్టింది.
మూడేళ్లలో పూర్తి..
రామాలయ నిర్మాణానికి కేవలం హిందువుల నుంచే కాదు, ఏ మతం వారు విరాళాలు ఇచ్చినా స్వీకరిస్తామని ట్రస్టు సభ్యులు ప్రకటించారు. అలాగే, ఆలయ నిర్మాణానికి సంబంధించి డ్రాయింగ్ వర్క్ పూర్తి చేసి 3 నుంచి 3.5 సంవత్సరాల వ్యవధిలో నిర్మాణం పూర్తి చేయాలని అనుకుంటున్నట్టు వెల్లడించారు.
ప్రధాన మందిరానికి సంబంధించిన 2.77 ఎకరాల భూమితో పాటు అంతకుముదే సేకరించిన 67 ఎకరాల్లో వివిధ కళారూపాలు, నిర్మాణాలు చేపట్టేందుకు సన్నద్ధమవుతోంది ఈ ట్రస్టు.
కరోనా నేపథ్యంలో మందిరం నిర్మాణ భూమి పూజకు దయచేసి ఎవరూ రావాలని అనుకోవద్దని, అందరూ ఇళ్లలోనే ఉండి దీపాలు వెలిగించాలని శ్రీరామ జన్మభూమి తీర్థ క్షేత్ర ట్రస్టు దేశ ప్రజలను కోరింది. రామాలయ ఉద్యమం ప్రారంభించిన 1984 నుంచి ఇప్పటి వరకు ప్రత్యక్షంగా, పరోక్షంగా తమ వెనక ఉన్న ప్రతి ఒక్కరికీ ఈ సందర్భంగా ట్రస్ట్ కృతజ్ఞతలు తెలిపింది.
ఇదీ చూడండి: అయోధ్య మందిరం.. రామ జన్మభూమా? కొత్త ఆలయమా?
