యూపీఏ ఛైర్పర్సన్ సోనియా గాంధీ లోక్సభ ఎంపీగా ప్రమాణ స్వీకారం చేశారు. రెండోరోజు పార్లమెంటు సమావేశాల్లో హిందీలో ప్రమాణం చేసిన ఆమెకు పలువురు భాజపా నేతలు శుభాకాంక్షలు తెలిపారు. కాంగ్రెస్ నేతలు ఉత్సాహంతో బల్లలు చరిచారు. సోనియా ప్రమాణం చేసే దృశ్యాలను ఆమె తనయుడు, కాంగ్రెస్ అధ్యక్షుడు రాహుల్ గాంధీ చరవాణిలో చిత్రీకరించారు.
సోనియాతోపాటు ఇవాళ భాజపా నేత, కేంద్ర మాజీ మంత్రి మేనకా గాంధీ ప్రమాణ స్వీకారం చేశారు. ఈ సందర్భంగా మేనక, సోనియా ఒకరికొకరు శుభాకాంక్షలు తెలుపుకున్నారు. ఉత్తర్ప్రదేశ్ సుల్తాన్పుర్ నుంచి ఎంపీగా గెలుపొందారు మేనక.
ములాయం ప్రమాణం..
సమాజ్వాదీ పార్టీ వ్యవస్థాపకుడు, యూపీ మాజీ సీఎం ములాయం సింగ్ యాదవ్ కూడా ఈ రోజే ఎంపీగా ప్రమాణం చేశారు. అఖిలేష్ యాదవ్ ఆయనను చక్రాల కుర్చీలో తీసుకొచ్చారు.
17వ లోక్సభ తొలి సమావేశాలు సోమవారం ప్రారంభమయ్యాయి. ప్రధానమంత్రి నరేంద్ర మోదీ, కాంగ్రెస్ అధ్యక్షుడు రాహుల్ గాంధీ, రక్షణ మంత్రి రాజ్నాథ్ సింగ్, హోంమంత్రి అమిత్షా తదితరులు మొదటిరోజు ప్రమాణ స్వీకారం చేసిన వారిలో ఉన్నారు.
ఇదీ చూడండి: స్పీకర్ ఓం బిర్లానే..! 10 పార్టీల మద్దతు
