కేంద్రం, ఈసీకి సుప్రీం కోర్టు నోటీసులు

ఈవీఎం, వీవీప్యాట్లలో లోపాలకు సంబంధించి దాఖలైన పిటిషన్​పై వివరణ ఇవ్వాలని ఎన్నికల సంఘానికి సుప్రీం కోర్టు నోటీసులు జారీ చేసింది. ఈవీఎం లోపాలపై ఫిర్యాదు తప్పు అని తేలితే..  జైలుశిక్ష విధిస్తామన్న ఈసీ నిబంధనను సవాల్ చేస్తూ పిటిషన్​ దాఖలైంది.

ఈవీఎం, వీవీప్యాట్లలో లోపాలపై ఎవరైనా చేసిన ఫిర్యాదు తప్పని తేలితే జైలుశిక్ష విధిస్తామన్న ఎన్నికల సంఘం నిబంధన 49ఎమ్​ఏను సవాలు చేస్తూ సుప్రీం కోర్టులో పిటిషన్​ దాఖలైంది. భారత ప్రధాన న్యాయమూర్తి జస్టిస్​ రంజన్​ గొగొయి నేతృత్వంలోని ధర్మాసనం ఈ పిటిషన్​పై వివరణ ఇవ్వాలని ఎన్నికల సంఘానికి, కేంద్రానికి నోటీసులు జారీ చేసింది.

ఎప్పుడు ఎలా పనిచేస్తాయో తెలియని మిషన్ల పనితీరుపై ఫిర్యాదు చేస్తే జైలుపాలు చేయడమనేది రాజ్యాంగం కల్పించిన పౌరుల భావప్రకటన స్వేచ్ఛకు విఘాతమని పిటిషన్​లో పేర్కొన్నారు.

సునీల్ అనే వ్యక్తి ఈ పిటిషన్​ దాఖలు చేశారు. కేంద్ర ఎన్నికల సంఘం నిబంధనతో ఈవీఎంలపై అనుమానాలు వచ్చినా ఫిర్యాదు చేయలేని పరిస్థితి నెలకొందంటూ ఆయన పిటిషన్​లో వెల్లడించారు. ఈ పిటిషన్​ను విచారించిన సర్వోన్నత న్యాయస్థానం నోటీసులు జారీ చేసింది.

• ఇదీ చూడండి: మరోసారి రసవత్తరంగా కన్నడ రాజకీయం