దిల్లీలో రాష్ట్రపతి భవన్ నుంచి ఇండియా గేట్ వరకు నిర్మించ తలపెట్టిన సెంట్రల్ విస్టాపై కీలక ఆదేశాలిచ్చింది సుప్రీం కోర్టు. ప్రాజెక్టును వ్యతిరేకిస్తూ పెండింగ్లో ఉన్న వ్యాజ్యాలపై నిర్ణయం తీసుకునే వరకు ఎలాంటి నిర్మాణాలు, లేదా కూల్చివేతలు చేపట్టకూడదని స్పష్టం చేసింది. అయితే.. ఈ ప్రాజెక్టు కోసం అవసరమైన కాగితపు వర్క్, ప్రతిపాదిత గ్రౌండ్ బ్రేకింగ్ వేడుకలతో ముందుకుసాగొచ్చని చెప్పింది.
సెంట్రల్ విస్టా ప్రాజెక్ట్పై దాఖలైన పలు వ్యాజ్యాలపై.. జస్టిస్ ఏఎం ఖాన్విల్కర్ నేతృత్వంలోని ధర్మాసనం విచారణ చేపట్టింది. ప్రాజెక్టు పట్ల కేంద్రం అనుసరిస్తున్న తీరుపై అసహనం వ్యక్తం చేసింది ధర్మాసనం. ఈ సందర్భంగా.. అత్యున్నత న్యాయస్థానం నిర్ణయం వెలువడే వరకు ప్రాజెక్టులో నిర్మాణాలు, కూల్చువేతల వంటివి చేపట్టబోమని ధర్మాసనానికి హామీ ఇచ్చారు సొలిసిటర్ జనరల్ తుషార్ మెహతా. ఆ క్రమంలో.. సెంట్రల్ విస్టా ప్రాజెస్ట్ శంకుస్థాపనకు అనుమతించింది న్యాయస్థానం.
నూతన పార్లమెంట్ భవనం సహా ఇతర విభాగాల నిర్మాణాలు ఒకే చోట చేపట్టేందుకు గత ఏడాది సెప్టెంబర్లో ఈ ప్రాజెక్టును ప్రకటించింది కేంద్రం. దేశ 75స్వాతంత్య్ర దినోత్సవం 2022, ఆగస్టు నాటికి పూర్తి చేయాలని లక్ష్యంగా పెట్టుకుంది. ఇదే ప్రాజెక్టులో ఉమ్మడి కేంద్ర సచివాలయాన్ని 2024 వరకు నిర్మించతలపెట్టారు.
డిసెంబర్ 10న పార్లమెంట్ భవన నిర్మాణానికి శంకుస్థాపన చేయనున్నారు ప్రధాని మోదీ. రూ.971 కోట్లతో చేపడుతోన్న ఈ నిర్మాణాన్ని 2022లోపు పూర్తి చేయాలని నిర్ణయించినట్లు తెలిపారు లోక్సభ స్పీకర్ ఓం బిర్లా.
ఇదీ చూడండి: సెంట్రల్ విస్టా నిర్మాణం మంచిదే: కేంద్రం
