మహిళల పట్ల వివిధ మతాల్లో ఉన్న వివక్షలకు సంబంధించిన అంశాలను 9 మంది న్యాయమూర్తులతో కూడిన రాజ్యాంగ ధర్మాసనం ఫిబ్రవరి 3లోపు క్రోడీకరిస్తుందని సుప్రీం కోర్టు తెలిపింది. అనంతరం ఈ అంశంపై ఎప్పుడు విచారణ జరగాలో నిర్ణయిస్తుందని పేర్కొంది. కేవలం 10 రోజుల్లోనే విచారణ పూర్తిచేయనున్నట్లు స్పష్టం చేసింది.
ధర్మాసనం క్రోడికరించే అంశాలు
వివిధ మత ప్రదేశాల్లో మహిళలు ప్రవేశించకుండా నిషేధం విధిస్తున్న అంశాలను రాజ్యాంగ ధర్మాసనం క్రోడీకరిస్తుందని భారత ప్రధాన న్యాయమూర్తి జస్టిస్ ఎస్ఏ బోబ్డే నేతృత్వంలోని త్రిసభ్య ధర్మాసనం స్పష్టం చేసింది. అవి..
- కేరళలోని శబరిమల అయ్యప్ప స్వామి ఆలయంలోకి యుక్త వయస్సులోని మహిళలు ప్రవేశించడంపై నిషేధం.
- మసీదుల్లోకి ముస్లిం మహిళలకు ప్రవేశార్హత లేకపోవడం.
- దావూది బోహ్రా ముస్లిం సమాజంలో స్త్రీలకు సున్తీ చేయడం
- పార్శీయేతర పురుషులను వివాహం చేసుకున్న పార్శీ మహిళలను అజియరీలోని పవిత్ర అగ్ని ఆలయంలోకి రాకుండా బహిష్కరించడం.
మత పరమైన విషయాలకు సంబంధించి విచారణకు హాజరవుతున్న న్యాయవాదులు కొన్ని చట్టపరమైన ప్రతిపాదనలు రూపొందించారని, న్యాయస్థానం వాటిని పరిశీలించాలని సీనియర్ న్యాయవాది వి.గిరి సుప్రీంకోర్టును కోరారు. దీనిపై స్పందించిన ధర్మాసనం.. ఈ కేసుకు సంబంధించి ఏకాభిప్రాయం సాధించేందుకు ఓ సమావేశం నిర్వహించాలని సీనియర్ న్యాయవాదులను జనవరి 13న ఆదేశించింది. కానీ న్యాయవాదులు ఏకాభిప్రాయానికి రాకపోవడం, న్యాయ ప్రశ్నావళిని రూపొందించకపోవడంపై తీవ్ర అసంతృప్తి వ్యక్తం చేసింది.
శబరిమలకే పరిమితం కాదు...
2019 నవంబర్ 14న ఐదుగురు సభ్యుల సుప్రీం ధర్మాసనం... మహిళలపై వివక్ష అనే అంశం కేవలం శబరిమలకే పరిమితంకాదని, ఇతర మతాల్లోని వివక్షలను కూడా పరిశీలించాల్సిందేనని స్పష్టం చేసింది.
ఇదీ చూడండి: కరోనా: చైనాలో 212కు చేరిన మృతులు.. ఎమర్జెన్సీ విధింపు