పౌరసత్వ సవరణ చట్టంపై భిన్న అభిప్రాయాలు వ్యక్తం అవుతున్నాయి. ఓ వైపు చట్టాన్ని వ్యతిరేకిస్తూ నిరసనలు హోరెత్తుతుంటే.. మరో వైపు ఈ సవరణ ద్వారా లబ్ధి పొందే శరణార్థులు ఆనందంలో మునిగి తేలుతున్నారు. భాజపా ప్రభుత్వం, ప్రధాని మోదీకి తమదైన రీతిలో ధన్యవాదాలు చెబుతున్నారు. ఈ నేపథ్యంలో దిల్లీలో స్థిరపడిన ఓ పాకిస్థానీ హిందూ మహిళ మోదీ కోసం పాట పాడి మరీ కృతజ్ఞతలు తెలిపింది.
వందలాది మంది శరణార్థులు పాకిస్థాన్ నుంచి భారత్కు వచ్చి పౌరసత్వం లేకుండానే జీవిస్తున్నారు. వారిలో దిల్లీలోని మజ్నూ టీలా బస్తీలో ఉంటున్న వన్ దేవీ ఒకరు. అలాంటి వారికి లబ్ధి చేకూర్చడానికి తీసువచ్చిన సీఏఏను అభినందిస్తూ ఏర్పాటు చేసిన ఓ సభలో వన్దేవీ పాల్గొంది. వేదికపై ఇప్పటికీ పాకిస్థాన్లో మగ్గుతున్న హిందువుల కోసం ఆమె పాట పాడింది.
ఆ తరువాత ఈటీవీ భారత్ వన్దేవీని కలిసి సీఏఏపై ఆమె అభిప్రాయాన్ని అడిగినప్పుడు... 'మోదీ నా మీద ఒట్టు... మీరు ధైర్యం కోల్పోవద్దు. దిగజారిపోయిన మా రాతలను మీరే మార్చాలి..' అంటూ పాట పాడి మరీ మోదీకి ధన్యవాదాలు తెలిపింది.
"ఏడేళ్ల క్రితం పాకిస్థాన్ నుంచి భారత్కు వచ్చేశాను. ఇక్కడికి వచ్చాక పౌరసత్వం లేక ఇబ్బందులు పడ్డాను. మాకు భారత పౌరసత్వం ఇస్తే బాగుండేది అనుకున్నాం. మా తాతా ముత్తాతలు హిందుస్థానీలే.. విభజన సమయంలో మేము పాక్కు వెళ్లిపోయాం. మా కుటుంబమంతా పాకిస్థాన్లో ఉంది. కొందరు మాత్రమే అక్కడి నుంచి భారత్కు వచ్చారు. పౌరసత్వ చట్ట సవరణ బిల్లు పాస్ అవ్వడం మాకెంతో సంతోషాన్నిచ్చింది. "
-వన్ దేవీ
ఇప్పుడు తాముంటున్న బస్తీలో ఇళ్లు లేవు, విద్యుత్, నీరు వంటి కనీస సదుపాయాలు లేవని... అయితే త్వరలో ప్రధాని మోదీ వారి కష్టాలన్నీ తీరుస్తారని ధీమా వ్యక్తం చేస్తోంది వన్దేవి.
ఇదీ చదవండి:ఆడపిల్ల జోలికెళితే.. 'కాల్'చేస్తున్న లిప్స్టిక్
