"కేరళ నుంచి రాహుల్ గాంధీ పోటీ చేస్తే రాష్ట్రంలో పార్టీ శ్రేణుల్లో ఉత్తేజం, శక్తి మరింత పెరుగుతాయి. అగ్రనేత పోటీకి దిగితే.. ఆ చుట్టు పక్కల స్థానాల్లో పోటీ చేసేవారికి బలం మరింత పెరుగుతుంది."
--శశి థరూర్, కాంగ్రెస్ నేత
సిద్ధరామయ్య ఆహ్వానం
కర్ణాటక నుంచి పోటీ చేయాలని రాహుల్ గాంధీని మాజీ సీఎం సిద్ధరామయ్య కొద్దిరోజుల కిందటే కోరారు.
"దేశానికి కాబోయే ప్రధాని రాహుల్ గాంధీ కర్ణాటక నుంచి పోటీ చేయాలని కోరుతున్నాం. పార్టీ అగ్రనాయకత్వానికి కన్నడ నేల ఎప్పుడూ మద్దతిస్తోంది. గతంలో దివంగత ప్రధాని ఇందిరా గాంధీ, ఏఐసీసీ ఛైర్పర్సన్ సోనియా గాంధీ ఇక్కడి నుంచి గెలిచినప్పుడే ఇది రుజువైంది."
--కర్ణాటక మాజీ సీఎం సిద్ధరామయ్య ట్వీట్
" నరేంద్ర మోదీ నేతృత్వంలోని భాజపా ప్రభుత్వంలో దక్షిణాది, ఉత్తరాది అన్న భావన దేశంలో పెరిగిపోయింది. రాహుల్ గాంధీ తమిళనాడు నుంచి గెలిస్తే ఆ అంతరాలు తొలిగిపోతాయి"
-- కె.ఎస్.అళగిరి, తమిళనాడు కాంగ్రెస్ అధ్యక్షుడు
కేరళ, కర్ణాటక, తమిళనాడుకు చెందిన కొందరు నేతలు కొద్దిరోజులుగా చేస్తున్న విజ్ఞప్తులు ఇవి. ఇందుకు రెండు ప్రధాన కారణాలు. ఒకటి... రాహుల్ పోటీ చేస్తే స్థానికంగా పార్టీ మరింత బలోపేతం అవుతుందని ఆశ. రెండోది... భాజపాకు సవాలు విసరడం. దక్షిణాదిన కాంగ్రెస్కు కాస్త పట్టుంది. భాజపా మాత్రం ఇప్పుడిప్పుడే బలపడే ప్రయత్నం చేస్తోంది. దక్షిణాదిన విస్తరణకు అధికార పక్షం చేస్తున్న యత్నాల్ని తిప్పికొట్టేందుకు రాహుల్ను నేరుగా రంగంలోకి దించడమే సరి అన్నది... కాంగ్రెస్ నేతల అభిప్రాయం.
"తర్వాతి ప్రధాని అవుతానన్న ఆత్మవిశ్వాసం ఉన్న అభ్యర్థి మాకున్నారు. దక్షిణాదిన, ఉత్తరాదిన రెండు చోట్ల పోటీ చేసి గెలుస్తానని ఆయన చాటిచెప్పాలని అనుకుంటున్నారు. నేను నరేంద్ర మోదీని ఓ ప్రశ్న అడగాలని అనుకుంటున్నా. రాహుల్ గాంధీకి ఉన్న ఆత్మవిశ్వాసం మీకుందా? ఉంటే తిరువనంతపురంలో నాపై పోటీ చేయండి."
-- శశిథరూర్, కాంగ్రెస్ నేత
కాంగ్రెస్ కంచుకోట నుంచి...!
వాయనాడ్ లోక్సభ స్థానం కేరళలో కాంగ్రెస్కు కంచుకోట. పార్టీ జాతీయాధ్యక్షుడు రాహుల్ గాంధీ అక్కడి నుంచి పోటీ చేయాలన్నది స్థానిక నేతల విజ్ఞప్తి.
"రాహుల్ గాంధీ దక్షిణాది నుంచి పోటీ చేయాలని పార్టీ కార్యకర్తలు, నాయకులు కోరుతున్నారు. అందువల్ల వాయనాడ్ నుంచి పోటీ చేయాలని రాహుల్ను కోరతాం. సానుకూల నిర్ణయం వస్తుందని ఆశిస్తున్నాం."
-- ఉమెన్ చాందీ, ఏఐసీసీ ప్రధాన కార్యదర్శి
కాదనకుండానే...
రాహుల్ అమేఠీ నుంచి పోటీ చేస్తారని చెబుతోంది కాంగ్రెస్. రెండో స్థానం నుంచి పోటీపై మాత్రం స్పష్టత ఇవ్వడంలేదు.
" కేరళ ప్రజలతోపాటు దేశ ప్రజలందరూ రాహుల్ గాంధీని ఎక్కువగా అభిమానిస్తున్నారని, ఇక్కడి నుంచే పోటీ చేయించాలని కేరళ నేతలు కోరారు. అయితే ఈ విషయంపై ఇంకా నిర్ణయం తీసుకోలేదు. 'అమేఠీ నా కర్మభూమి' అని రాహుల్ గాంధీ ఇప్పటికే చాలా సార్లు చెప్పారు."
-- రణ్దీప్ సుర్జేవాలా, కాంగ్రెస్ అధికార ప్రతినిధి
భాజపా విమర్శలు మొదలు..
రాహుల్ గాంధీ దక్షిణాది నుంచి పోటీ చేస్తారనే నిర్ణయం వెలువడక ముందే భాజపా నేతలు విమర్శలు ప్రారంభించారు. అమేఠీ నియోజకవర్గానికి రాహుల్ గాంధీ ఏమీ చేయలేదని, ఇక్కడి ప్రజలు ఆయనను తిరస్కరించారని కేంద్రమంత్రి స్మృతి ఇరానీ దుయ్యబట్టారు. ఓటమి భయంతోనే మరో స్థానం నుంచి పోటీకి కాంగ్రెస్ అధ్యక్షుడు ప్రయత్నాలు ప్రారంభించారని ఎద్దేవా చేశారు.
2014లో రాహుల్పై అమేఠీ లోక్సభ స్థానం నుంచి పోటీ చేసి ఓడిపోయారు స్మృతి. ఇప్పుడు మరోసారి ఆయనపై ఇదే స్థానంలో పోటీకి దిగనున్నారు.
