ఉగ్రవాద వ్యతిరేక బృందం మాజీ సారథి హేమంత్ కర్కరేపై సంచలన ఆరోపణలు చేశారు సాధ్వి ప్రజ్ఞ సింగ్. మాలేగావ్ కేసు దర్యాప్తు విషయంలో హేమంత్ తనను వేధించారని ఆరోపించారు. ఎలాంటి రుజువు లేకున్నా బలవంతంగా జైల్లో ఉంచేందుకు ప్రయత్నించారంటూ మరికొన్ని అనుచిత వ్యాఖ్యలు చేశారు.
26/11 ముంబయి ఉగ్రదాడి సమయంలో ఉగ్రవాద వ్యతిరేక విభాగానికి సారథిగా ఉన్నారు కర్కరే. ఆ సమయంలోనే తీవ్రవాదులతో పోరాడి.. మరో ఇద్దరు పోలీసు అధికారులతో కలిసి అమరుడయ్యారు. అలాంటి వ్యక్తిని ఉద్దేశించి ప్రజ్ఞ చేసిన వ్యాఖ్యలను రాజకీయ ప్రముఖులు తీవ్రంగా తప్పుబట్టారు.
ఈసీకి ఫిర్యాదు...
మధ్యప్రదేశ్ ప్రధాన ఎన్నికల కార్యాలయంలో ప్రజ్ఞకు వ్యతిరేకంగా ఫిర్యాదు నమోదైంది. విచారణ చేపట్టి, చర్యలు తీసుకుంటామని అధికారులు చెప్పారు.
విమర్శలు...
ప్రజ్ఞ సింగ్ ఆరోపణలను తప్పుబట్టారు భోపాల్ కాంగ్రెస్ అభ్యర్థి దిగ్విజయ్ సింగ్.
''హేమంత్ కర్కరే నిబద్ధత కలిగిన అధికారి. దేశం కోసం ప్రాణాలర్పించిన గొప్ప వీరుడిని గౌరవించాలి. ఆయనపై అనుచిత వ్యాఖ్యలు చేయకూడదు. ఈసీ చర్యలు తీసుకోవాలి.''
- దిగ్విజయ్ సింగ్, కాంగ్రెస్ నేత
ఐపీఎస్ అధికారుల సంఘం భాజపా అభ్యర్థి వ్యాఖ్యలను తీవ్రంగా ఖండించింది.
హేమంత్ కర్కరేపై ప్రజ్ఞ సింగ్ వ్యాఖ్యలపై స్పందించారు భాజపా నేత నళిన్ కోహ్లీ. అది ఆమె వ్యక్తిగతానికి సంబంధించిన అంశమని పేర్కొన్నారు.
''హేమంత్ కర్కరే త్యాగానికి నేను నమస్కరిస్తున్నా. భారతదేశానికి ఆయనొక వీరుడు. భారత దేశాన్ని రక్షించడానికి ప్రాణాలర్పించిన ప్రతి ఒక్కరినీ మేం గౌరవిస్తాం. హేమంత్ కర్కరే సేవల్ని మేం గుర్తించాం. ప్రజ్ఞ వ్యాఖ్యలు భాజపాకు ఆపాదించొద్దు. అవి ఆమె వ్యక్తిగత విషయానికి సంబంధించినవి. ఆమె విచారణ ఎదుర్కొన్నారు కాబట్టి స్పష్టంగా తెలుస్తోంది వ్యక్తిగతమని. కాబట్టి ఇది భాజపాకు సంబంధించినది కాదు. దీనిని రాజకీయం చేయాలనుకోవట్లేదు.''
- నళిన్ కోహ్లీ, భాజపా నేత
భాజపా అభ్యర్థి...
సాధ్వి ప్రజ్ఞ సింగ్ ఠాకుర్ను ఏప్రిల్ 17న భారతీయ జనతా పార్టీ.. మధ్యప్రదేశ్ భోపాల్ లోక్సభ స్థానం నుంచి తమ అభ్యర్థిగా ప్రకటించింది. ఇక్కడే ప్రముఖ కాంగ్రెస్ నేత, మధ్యప్రదేశ్ మాజీ ముఖ్యమంత్రి దిగ్విజయ్ సింగ్ బరిలో ఉన్నారు.
ప్రజ్ఞ ప్రస్తుతం బెయిల్పై ఉన్నారు. మాలేగావ్ పేలుళ్లకు సంబంధించిన ఓ కేసులో కోర్టు ఆమెను నిర్దోషిగా విడుదల చేసింది. మరో కేసులో ఆమె ఇంకా విచారణ ఎదుర్కొంటున్నారు.
ఇదీ చూడండి: ములాయం, మాయ ఐక్యరాగం- మోదీపై ధ్వజం
