కశ్మీర్లో టాప్ 10 ‘మోస్ట్ వాంటెడ్’ ఉగ్రవాదుల పేర్లతో ఓ జాబితా సామాజిక మాధ్యమాల్లో చక్కర్లు కొడుతోంది. దీనిని భద్రతా సంస్థలు జారీ చేసినట్లు ప్రచారం సాగుతోంది. అయితే ఈ జాబితాకు సంబంధించి మూలాలపై ఎవరికీ స్పష్టత లేదు.
కశ్మీర్ లోయలో మూడు భద్రతా సంస్థలు కీలకంగా పనిచేస్తాయి. ఇవి సైన్యం, సీఆర్పీఎఫ్, జమ్ముకశ్మీర్ పోలీసు విభాగం. వీటిలో ఏ సంస్థ కూడా జాబితాను అధికారికంగా విడుదల చేయలేదని స్పష్టం చేశాయి.
పాక్ పనేనా!
ఇది పాకిస్థాన్కు చెందిన పనిగా పలువురు అధికారులు అనుమానిస్తున్నారు. ఉగ్రవాదులకు అతిగా ప్రచారం కల్పించి, వారికి ప్రజల్లో లేని ఆదరణను పెంచేందుకే పాక్ నిఘా సంస్థ-ఐఎస్ఐ కుట్ర పన్ని ఉంటుందని భావిస్తున్నారు. ఈ విషయంపై ఈటీవీ భారత్ ప్రతినిధితో ఓ భద్రతా అధికారి మాట్లాడారు.
"దేశంలోని ఏ భద్రతా సంస్థ దీన్ని జారీ చేయకపోతే.. ఇది కచ్చితంగా సరిహద్దు ఆవల నుంచి వచ్చినదే. అదే నిజమైతే.. పాక్ నిఘా సంస్థ ఐఎస్ఐ లేదా దాని అనుబంధ సంస్థల పనే ఇది."
- భద్రతా అధికారి
ఇలా చేయటం వెనుక చాలా పెద్ద కుట్ర ఉందని అధికారి అనుమానించారు. ఉగ్రవాదుల్లో క్రియాశీలకంగా ఉన్నవారిని గానీ.. ఎదురుకాల్పుల్లో చనిపోయిన వారిని గానీ పేర్లను బహిర్గతం చేయవద్దని ఇటీవల భారత ప్రభుత్వం నిర్ణయించింది. వారికి ప్రాచుర్యం కల్పించవద్దని తెలిపింది. ఈ వ్యూహాన్ని దెబ్బతీసేందుకే ఈ పని చేసి ఉంటారని ఆయన అన్నారు.
"ఈ చర్య చనిపోయిన లేదా క్రియాశీలకంగా ఉగ్రవాదులకు ప్రచారం కల్పించే లక్ష్యంతోనే చేసింది. ఫలితంగా వారిపై సానుభూతి ఏర్పడి అమాయకులు తుపాకులు పట్టుకునేలా ప్రోత్సహించేందుకే ఈ కుట్ర. హతమైన ఉగ్రవాదుల అంత్యక్రియల సమయంలో ఉద్వేగానికి లోనయ్యే యువతకు వల వేస్తారు. 2016 జులై 9న బుర్హన్ వనీ హతమైనప్పుడు ఇదే జరిగింది. చాలా మంది యువత ఉగ్రవాదం వైపు మళ్లారు. "
- భద్రతా అధికారి
లేని ప్రచారం ఎందుకు?
ఇటువంటి కారణాలతోనే ఉగ్రవాదుల పేర్లను బహిర్గతం చేయకుండా కొత్త విధానాన్ని అనుసరించాలని ప్రభుత్వం నిర్ణయించింది. హిజ్బుల్ ముజాహిద్దీన్ కీలక సభ్యుడు రియాజ్ నాయికూను మే 6న చంపిన తర్వాత నుంచి దేశంలో కొత్త విధానం ప్రారంభమైంది. దీని గురించి సైన్య అధికార ప్రతినిధి కల్నల్ అమన్ ఆనంద్ ఇటీవల స్పష్టతనిచ్చారు.
"చనిపోయిన ఉగ్రవాదుల పేర్లను మేం వెల్లడించం. వారికి లేని కీర్తి ఆపాదించం. వాళ్లు కేవలం ఉగ్రవాదులు. అంతే."
- కల్నల్ అమన్ ఆనంద్
రెండు సార్లు..
దేశంలో ఇప్పటివరకు రెండు సార్లు 'మోస్ట్ వాంటెడ్' జాబితాను భద్రతా దళాలు విడుదల చేశాయి. 2018 ఏప్రిల్ 3న ఏడుగురు ఉగ్రవాదులతో మొదటిది, అదే ఏడాది జూన్ 22న 21 మందితో రెండో జాబితాను ప్రకటించాయి.
ప్రస్తుతం చలామణీలోకి వచ్చిన 10 మంది ఉగ్రవాదుల జాబితాలో హిజ్బుల్ ముజాహిదీన్కు చెందిన ఐదుగురు, జైషే మహమ్మద్ నుంచి ముగ్గురు, మరో ఇద్దరు లష్కరే తొయిబాకు చెందినవారు.
(రచయిత- సంజీవ్ కుమార్ బారువా)
