బయిల్ పోలా... మరాఠా సంప్రదాయ ఉత్సవం. తమ కోసం కష్టపడే ఎద్దులకు కృతజ్ఞతగా ఈ పేరుతో ప్రత్యేక పూజలు నిర్వహిస్తారు మహారాష్ట్ర ప్రజలు. బయిల్ పోలాలో భాగంగా అహ్మద్నగర్లోని సంగమ్నేర్కు చెందిన బాపూ సాహెబ్ శిందే కుటుంబం... రెండు ఎడ్లకు ప్రత్యేక పూజలు చేసింది. ఎద్దులకు నైవేద్యం సమర్పించింది. క్రతువులో భాగంగా.. నైవేద్యపు పళ్లెంలో ఉంచాల్సిన బంగారాన్ని పక్కింటి మహిళ నుంచి అరువు తెచ్చుకుని మరీ పెట్టారు. అది కూడా ఆహారమే అనుకున్న వృషభ రాజం సంతోషంగా ఆరగించేసింది. మొత్తం ఒకటిన్నర లక్షల రూపాయలు విలువైన పసిడి ఎద్దు ఉదరాన్ని చేరింది. మలవిసర్జన ద్వారా బయటకు వస్తుందని వేచి చూసింది ఆ కుటుంబం.
నెక్లెస్ను పక్కింటివారికి ఇవ్వాల్సి ఉండటం, అరువిచ్చిన మహిళను అత్తింటివారు వేధిస్తుండటం కారణంగా కుంగిపోయింది శిందే కుటుంబం. ఎద్దుకు ఆపరేషన్ చేయడం ద్వారా బంగారాన్ని బయటకు తీయాలని నిర్ణయించుకుంది. ఎనిమిది రోజుల అనంతరం పశువైద్యుడు సర్జరీ చేసి ఎద్దు ఉదరం నుంచి పసిడిని బయటకు తీశారు. పనిచేసే స్థితిలో లేని కారణంగా ఆ రైతు ఇష్టంగా పెంచుకున్న ఎద్దును తెగనమ్ముకున్నాడు.
ఇదీ చూడండి: సచిన్ రికార్డ్... 9 నిమిషాల్లో 45 కప్పుల టీ స్వాహా
