దిల్లీలో నేడు కాంగ్రెస్ అధినేత్రి సోనియాగాంధీ, ఎన్సీపీ అధినేత శరద్ పవార్ల మధ్య జరగాల్సిన భేటీ వాయిదా పడింది. పుణెలో ఆదివారం ఎన్సీపీ కోర్ కమిటీ సమావేశం జరుగనుండడమే ఇందుకు కారణమని ఆ పార్టీ వర్గాలు తెలిపాయి. అయితే మరలా ఈ ఇరువురు నేతల సమావేశం ఎప్పుడు ఉంటుందో మాత్రం స్పష్టం చేయలేదు.
మహారాష్ట్రలో శివసేనతో కలిసి సంకీర్ణ ప్రభుత్వం ఏర్పాటుచేసే విషయమై ఆదివారం భేటీ కావాలని శరద్పవార్, సోనియాగాంధీ తొలుత నిర్ణయించారు. అయితే తాజాగా ఈ భేటీ వాయిదా పడింది.
"ఎన్సీపీ కోర్ కమిటీ సమావేశం పుణెలో సాయంత్రం 4 గంటలకు ప్రారంభమవుతుంది. ఆ తరువాతనే పవార్ దిల్లీ బయలుదేరి వెళ్లాలి. కనుక ఆదివారం సోనియాతో శరద్పవార్ భేటీ అయ్యే అవకాశాలు తక్కువ."- ఎన్సీపీ వర్గాలు
గవర్నర్తో ఎన్సీపీ, కాంగ్రెస్, సేన నేతల భేటీ వాయిదా
మహారాష్ట్రలో వరదల కారణంగా రైతులకు కలిగిన నష్టంపై రాష్ట్ర గవర్నర్ భగత్సింగ్ కోశ్యారీతో చర్చించేందుకు నేడు సమావేశం కావాలని నిర్ణయించినప్పటికీ.. ఈ భేటీని వాయిదా వేశాయి శివసేన, ఎన్సీపీ, కాంగ్రెస్. వ్యవసాయ సమస్యలపైన చర్చించేందుకేనని ఆయా పార్టీల నేతలు చెప్పుకొస్తున్నప్పటికీ.. ప్రభుత్వ ఏర్పాటు కోసమేననే ఊహాగానాలు ఉన్నాయి.
మనకేంటి?
శివసేన, కాంగ్రెస్తో కలిసి ప్రభుత్వం ఏర్పాటుచేస్తే.. ఎన్సీపీకి దక్కాల్సిన పోర్టుఫోలియోలపై కోర్ కమిటీ సమావేశంలో చర్చించనున్నారని సమాచారం.
అహ్మద్తో పవార్ భేటీ..
మహారాష్ట్రలో ప్రభుత్వ ఏర్పాటుపై చర్చించడానికి... శరద్ పవార్ కాంగ్రెస్ సీనియర్ నేత అహ్మద్ పటేల్ను సోమవారం లేదా మంగళవారం కలిసే అవకాశం ఉందని ఎన్సీపీ వర్గాలు తెలిపాయి. సోనియాగాంధీతో పవార్ భేటీ ఆ తరువాత జరుగవచ్చని ఎన్సీపీ వర్గాలు పేర్కొన్నారు.
నిప్పు, ఉప్పు కలుస్తాయా?
మహారాష్ట్రలో ప్రస్తుతం రాష్ట్రపతిపాలన కొనసాగుతోంది. ముఖ్యమంత్రి పీఠం విషయమై భాజపా-శివసేన మధ్య విబేధాలు రావడమే ఇందుకు కారణం. ఈ నేపథ్యంలో కాంగ్రెస్, ఎన్సీపీ, శివసేన కలిసి సంకీర్ణ ప్రభుత్వం ఏర్పాటుచేయడానికి పూనుకున్నాయి. ఇందుకోసం కనీస ఉమ్మడి కార్యక్రమం రూపొందించే పనిలో ఈ మూడు పార్టీలు ఉన్నాయి.
ఇదీ చూడండి: ఆర్కామ్ డైరెక్టర్ పదవికి అనిల్ అంబానీ రాజీనామా
