హైడ్రాక్సీక్లోరోక్విన్ ట్రయల్స్ను కరోనాపై జరుగుతున్న అధ్యయనాల నుంచి తాత్కాలికంగా తొలిగించింది ప్రపంచ ఆరోగ్య సంస్థ(డబ్లూహెచ్ఓ). ఈ నిర్ణయంపై భారత వైద్యుల నుంచి మిశ్రమ స్పందన లభిస్తోంది.
ఇకపై దేశంలోని వైద్య కేంద్రాలు.. హైడ్రాక్సీక్లోరోక్విన్ను కరోనా బాధితులకు అందించే చికిత్స నుంచి తప్పించాలని కొందరు అభిప్రాయపడుతున్నారు. అయితే డబ్ల్యూహెచ్ఓ నిర్ణయానికి భారత్ కట్టుబడి ఉండాల్సిన అవసరం లేదని కొందరు చెబుతున్నారు.
హెచ్సీక్యూ, క్లోరోక్విన్ లేదా.. అజిత్రోమైసిన్-హెచ్సీక్యూ, క్లోరోక్విన్ కాంబినేషన్లో చికిత్స అందించిన బాధితుల్లో హృద్రోగ సమస్యలు అధికమై ప్రాణాలు కోల్పోయే ప్రమాదం అధికంగా ఉందని లాన్సెట్ అనే అధ్యయనంలో తేలినట్టు దిల్లీలోని ఊపితిత్తుల వైద్యుడు డా. అరవింద్ కుమార్ తెలిపారు.
15 వేలమంది రోగులపై ఈ అధ్యయనం చేశారు. అనంతరం ఔషధం తీసుకోని వారి ఆరోగ్య వివరాలతో పోల్చి చూశారు.
అయితే హెచ్సీక్యూపై తుది నిర్ణయం భారత్దే అని ఇతర వైద్యులు అభిప్రాయపడుతున్నారు.
"ఇది మార్గదర్శకం మాత్రమే. కచ్చితంగా పాటించాలని ఏం లేదు. అందువల్ల ఈ విషయంలో ఏం చేయాలో నిర్ణయించుకోవడానికి భారత్కు పూర్తి స్వేచ్ఛ ఉంది. హెచ్సీక్యూతో ముందుకు వెళ్లాల్లో.. లేకపోతే ఇక్కడితే ఆగిపోవాలో.. భారత్ ఇష్టం."
-- డా. రాజేశ్ గుప్త, పల్మనాలాజీ అండ్ క్రిటికల్ కేర్ అడిషనల్ డైరక్టర్, ఫోర్టిస్ నోయిడా.
అయితే ఇతర నిపుణుల సూచనలను కూడా పరిగణించి నిర్ణయం తీసుకోవాలని.. లేకపోతే 'హెచ్సీక్యూను ఇంకా ఎందుకు వాడుతున్నార'ని ప్రజల నుంచి అనేక సందేహాలు వెల్లువెత్తుతాయని రాజేశ్ పేర్కొన్నారు.
ప్రాణాంతక కరోనాపై పోరులో హైడ్రాక్సీక్లోరోక్విన్ను ఒక గేమ్ ఛేంజర్గా భావించారు అనేకమంది వైద్య పరిశోధకులు. అమెరికా అధ్యక్షుడు డొనాల్డ్ ట్రంప్ ఈ ఔషధ వినియోగానికి విపరీతంగా మద్దతు తెలిపారు. ప్రపంచంలోని అనేక దేశాలకు భారత్ ఈ మందును సరఫరా చేసింది.
అయితే హైడ్రాక్సీక్లోరోక్విన్తో హృద్రోగ సమస్యలు పెరిగి ప్రాణాలు కోల్పోయే అవకాశముందని గతవారం లాన్సెట్ ఓ అధ్యయనంలో వెల్లడించింది. ఈ నేపథ్యంలో క్లినికల్ ట్రయల్స్లో హైడ్రాక్సీక్లోరోక్విన్ను తాత్కాలికంగా నిలిపివేస్తున్నట్టు ప్రకటించింది డబ్ల్యూహెచ్ఓ.
