బిహార్ అసెంబ్లీ ఎన్నికల్లో మహాఘట్ బంధన్ సీట్ల కేటాయింపుపై స్పష్టత వచ్చినట్లు తెలుస్తోంది. కాంగ్రెస్, రాష్ట్రీయ జనతా దళ్(ఆర్జేడీ) మధ్య సీట్ల పంపకంపై భేదాభిప్రాయాలు తలెత్తినట్లు ఊహాగానాలు వినిపించిన వేళ.. ఇరుపార్టీలు ఓ అంగీకారానికి వచ్చాయని విశ్వసనీయ వర్గాలు తెలిపాయి. బిహార్లో రేపే దీనిపై ప్రకటన చేసే అవకాశం ఉన్నట్లు సమాచారం.
ఈ మహాకూటమి నుంచి ఆర్జేడీకి 145 స్థానాలు కేటాయించినట్లు ఓ సీనియర్ నాయకుడు తెలిపారు. ఇందులో వికాస్షీల్ ఇన్సాన్ పార్టీకి కొన్ని స్థానాలు ఇవ్వాల్సి ఉంటుందని పేర్కొన్నారు.
కాంగ్రెస్-70, ఇతర వామపక్షాలు సీపీఐ,సీపీఐ(ఎం), సీపీఐ(ఎంఎల్) కలిపి 30 స్థానాల్లో బరిలోకి దిగనున్నట్లు తెలుస్తోంది.
అయితే.. లోక్సభ ఉపఎన్నిక జరగనున్న వాల్మీకి నగర్ నుంచి ఎవరు పోటీ చేసేది ఇంకా తేలలేదు. ఇక్కడ ఆర్జేడీ, కాంగ్రెస్ రెండు పార్టీలూ ఆసక్తి చూపిస్తున్నాయి.
ఎన్డీఏ కూడా...
అధికార కూటమి ఎన్డీఏ కూడా అక్టోబర్ 4కు ముందే సీట్ల పంపకంపై ప్రకటన చేసే అవకాశముందని సమాచారం.
బిహార్లో 243 అసెంబ్లీ స్థానాలకు 3 విడతల్లో ఎన్నికలు జరగనున్నాయి. తొలి దశలో 71 స్థానాలకు అక్టోబర్ 28న పోలింగ్ నిర్వహించనున్నారు.
ఇదీ చూడండి: బిహార్ బరి: తొలిరోజు మూడు నామినేషన్లే!
