మహా 'సర్కార్​'లో ఎన్సీపీకే పెద్ద పీట.. అజిత్​కు ఆర్థికం

మహారాష్ట్ర 'మహా వికాస్​ అఘాడీ' కూటమి ప్రభుత్వంలో మంత్రులకు శాఖల కేటాయింపు పూర్తయింది. ఊహించినట్లుగానే శరద్​ పవార్​ నేతృత్వంలోని ఎన్సీపీకే అధిక ప్రాధాన్యం దక్కింది. కీలక శాఖలను సొంతం చేసుకుంది. ఉప ముఖ్యమంత్రి అజిత్​ పవార్​ ఆర్థికం, అనిల్​ దేశ్​ముఖ్​ హోం శాఖ బాధ్యతలు నిర్వర్తించనున్నారు. ఠాక్రే వంశం నుంచి తొలిసారి మంత్రిగా బాధ్యతలు చేపట్టిన ఆదిత్యకు పర్యటకం, పర్యావరణ మంత్రిత్వ శాఖను కేటాయించారు.

శివసేన, కాంగ్రెస్​, ఎన్సీపీ నేతృత్వంలోని మహారాష్ట్ర 'మహా వికాస్​ అఘాడీ' కూటమి ప్రభుత్వంలో మంత్రులకు శాఖలు కేటాయించారు. ముఖ్యమంత్రి ఉద్ధవ్​ ఠాక్రే పంపిన ప్రతిపాదనకు గవర్నర్​ భగత్​సింగ్​ కోశ్యారీ ఆమోదం తెలిపారు. డిసెంబర్​ 30న 36 మంది మంత్రులతో మంత్రివర్గాన్ని విస్తరించారు ఠాక్రే. శనివారం.. శాఖల కేటాయింపు దస్త్రాన్ని గవర్నర్​కు పంపించగా ఆయన ఆమోదించారు.

మంత్రిత్వ శాఖల్లో శరద్​ పవార్​ నేతృత్వంలోని ఎన్సీపీకే అగ్రతాంబూలం దక్కింది. కీలక శాఖలన్నీ వీరి వద్దే ఉన్నాయి. ఉప ముఖ్యమంత్రి అజిత్​ పవార్​కు ఆర్థిక శాఖ కేటాయించారు. ఎన్సీపీకే చెందిన అనిల్​ దేశ్​ముఖ్​కు​ హోం శాఖ దక్కింది. ముందుగా అజిత్​ హోం బాధ్యతలు చేపడుతారని ఊహాగానాలు వినిపించినా అధిష్ఠానం.. అనిల్​ వైపే మొగ్గుచూపింది.

ఇదీ చూడండి: 'మహా' విస్తరణ: ఆదిత్యకు కేబినెట్​.. పవార్​కు డిప్యూటీ

కాంగ్రెస్​ సీనియర్​ నేత బాలాసాహెబ్​ థోరఠ్​కు రెవెన్యూ దక్కగా.. ప్రజా పనుల మంత్రిత్వ విభాగాన్ని మహారాష్ట్ర మాజీ ముఖ్యమంత్రి, కాంగ్రెస్​ నేత అశోక్​ చవాన్​ చూడనున్నారు.

శివసేన నుంచి ఏక్​నాథ్​ శిందేకు పట్టణాభివృద్ధి, సుభాశ్​ దేశాయ్​కు పరిశ్రమలు, మైనింగ్​, మరాఠీ భాష శాఖలు కేటాయించారు.

ఆదిత్యకు పర్యటకం...

ఠాక్రే కుటుంబం నుంచి తొలిసారి ఎన్నికల్లో గెలిచి, మంత్రిగా ప్రమాణ స్వీకారం చేసిన ఆదిత్య ఠాక్రే.. పర్యటకం, పర్యావరణ మంత్రిత్వ శాఖ బాధ్యతలు చూడనున్నారు. సీఎం ఉద్ధవ్​ ఠాక్రే తనయుడిగానే కాకుండా యువసేన అధినేతగా తనకంటూ ప్రత్యేక గుర్తింపు తెచ్చుకున్నారు ఆదిత్య.

ఎవరికీ కేటాయించని సాధారణ పరిపాలన, ఐటీ, ప్రజా సంబంధాలు ఇతర శాఖలను ముఖ్యమంత్రే స్వయంగా పర్యవేక్షించనున్నారు.

ఇదీ చూడండి: 'మహా' పదవుల పంపకాలపై కాంగ్రెస్​లో అసంతృప్తి!