ముఖ్యమంత్రి దేవేంద్ర ఫడణవీస్పైనే మహారాష్ట్ర రాజకీయాల దిశ ఆధారపడి ఉంటుందని శివసేన తెలిపింది. రాష్ట్ర ప్రజల అభీష్టం, దేశ ప్రయోజనాల దృష్ట్యా ప్రభుత్వ ఏర్పాటు త్వరగా జరగాలని తమ పార్టీ పత్రిక సామ్నాలో ఓ సంపాదకీయాన్ని ప్రచురించింది సేన.
"దిల్లీకి వెళ్లి తిరిగివచ్చిన వెంటనే.. ముఖ్యమంత్రి దేవేంద్ర ఫడణవిస్ త్వరగా చర్యలు తీసుకోవాల్సిన అవసరం ఉంది. ఆయన నిర్ణయాలపైనే మహారాష్ట్ర రాజకీయాలు ఆధారపడి ఉన్నాయి."
-శివసేన ప్రకటన.
సోమవారం దిల్లీకి వెళ్లిన ఫడణవీస్.. కేంద్ర హోంమంత్రి, భాజపా అధ్యక్షుడు అమిత్షాతో భేటీ అయ్యారు. సమావేశం అనంతరం మహారాష్ట్రలో నూతన ప్రభుత్వం ఏర్పాటవుతుందని ఫడణవీస్ వ్యాఖ్యానించారు. భాజపాకు సీట్లు తక్కువ రావడంపై అమిత్షాకు ఫడణవీస్ వివరించారని తెలుస్తోంది.
ఐదేళ్ల పదవీకాలాన్ని పంచుకోవడంపై రెండు పార్టీల మధ్య ప్రచ్ఛన్న యుద్ధం జరుగుతున్న నేపథ్యంలో తమ సామ్నా పత్రికలో సంపాదకీయాల ద్వారా భాజపాపై తీవ్ర స్థాయిలో విరుచుకుపడుతోంది శివసేన. తాజా రాజకీయ సంక్షోభానికి కారణం భాజపా, ముఖ్యమంత్రి ఫడణవీస్ అని ఆరోపిస్తోంది.
"ప్రభుత్వ ఏర్పాటు అంశం దారుణంగా తయారైంది. ఈ పరిస్థితిని ఆసరాగా తీసుకుని రాజ్యాంగ వ్యతిరేకంగా అధికారాన్ని అట్టిపెట్టుకునేందుకు రాజకీయ క్రీనీడలు జరుగుతున్నాయి. భాజపా జాతీయ అధ్యక్షుడు అమిత్షాతో సమావేశం అనంతరం రెండోసారి ముఖ్యమంత్రిగా ప్రమాణస్వీకారం చేస్తానని ఫడణవిస్ వ్యాఖ్యానించారు. ప్రధాని మోదీ, షా ఒకవైపు.. కాంగ్రెస్ అధ్యక్షురాలు సోనియా గాంధీ, శరద్పవార్ మరోవైపు ఉండి అవసరమైన మెజారిటీని ఏర్పరిచేందుకు కృషి చేస్తున్నారు."
-సామ్నా పత్రిక సంపాదకీయంలోని ఓ వాక్యం
కాంగ్రెస్, ఎన్సీపీ కలిసినా అవసరమైన మెజారిటీ సాధ్యం అయ్యే పరిస్థితులు కన్పించడం లేదని అభిప్రాయపడింది సేన. మెజారిటీ సాధించడం పొగమంచుతో కూడిన దిల్లీలో విమానాన్ని దించడమంత కష్టమని వ్యంగ్యాస్త్రాలు సంధించింది.
'భాజపా-సేన విఫలమైతే మరో ప్రత్యామ్నాయం'
ప్రభుత్వ ఏర్పాటులో భాజపా, శివసేన విఫలమైతే మరో ప్రత్యామ్నాయం గురించి తాము ఆలోచాల్సి వస్తుందని ఎన్సీపీ మహారాష్ట్ర అధ్యక్షుడు జయంత్ పాటిల్.
"భాజపా, శివసేన కలసి ప్రభుత్వ ఏర్పాటుపై మార్గం చూపలేకపోతే మేం మరో ప్రత్యామ్నాయం గురించి తీవ్రంగా ఆలోచించాల్సి వస్తుంది."
-జయంత్ పాటిల్, ఎన్సీపీ అధ్యక్షుడు, మహారాష్ట్ర విభాగం
రాష్ట్రపతి పాలనను విధిస్తే ప్రజలు సహించరని జయంత్ అభిప్రాయపడ్డారు.
అక్టోబర్ 24న వెలువడిన మహారాష్ట్ర శాసనసభ ఫలితాల్లో భాజపా 105 సీట్లు సాధించగా.. శివసేన 56 గెలిచింది. ఇరు పార్టీల సీట్లు కలిపితే 161 అవుతాయి. అయితే ఐదేళ్ల ప్రభుత్వంలో చెరో సగం పదవీకాలం ఉండాలని సేన పట్టుబడుతున్న కారణంగా సంకీర్ణంపై నీలి నీడలు కమ్ముకున్నాయి.
ఎన్సీపీ 54, కాంగ్రెస్ 44 సీట్లు గెలిచాయి. ఈ రెండు పార్టీలు కలిసినా.. ప్రభుత్వ ఏర్పాటుకు మరో పార్టీకి మద్దతివ్వాల్సిన పరిస్థితి ఏర్పడింది.
ఇదీ చూడండి: 'విదేశీ గోవులు 'ఆంటీలు'.. మన ఆవులే అమ్మలు'
