ఓ చిన్నారికి అత్యవసరంగా వైద్యం అందించడం కోసం నాలుగు రాష్ట్రాల ప్రభుత్వాలు లాక్డౌన్ నిబంధనలు సడలించాయి. ప్రత్యేక అంబులెన్స్ ఏర్పాటు చేసి, పటిష్ట పోలీసు భద్రతతో రాష్ట్రాల సరిహద్దులు దాటించి గమ్యస్థానానికి చేర్చేందుకు కృషి చేస్తున్నాయి.
ప్రాణాంతక వ్యాధితో పోరాటం
కేరళ అలప్పుజకు చెందిన చెర్తాలా వినీత్, గోపికల కుమార్తె అన్విత. ఒకటిన్నర ఏళ్ల ఈ చిన్నారి కంటిని ప్రభావతం చేసే 'రెటినోబ్లాస్టోమా' అనే అరుదైన వ్యాధితో బాధపడుతోంది. చిన్నారి అన్వితకు చాన్నాళ్లుగా తెలంగాణ హైదరాబాద్లోని ఓ ఆసుపత్రిలో చికిత్స అందిస్తూ వస్తున్నారు. చాలా రోజుల క్రితమే.... ఏప్రిల్ 7న (రేపటి రోజున) అదే ఆసుపత్రిలో చిన్నారి అన్వితకు కీమోథెరపీ చేయడానికి షెడ్యూల్ ఖరారైంది.
నిస్సహాయస్థితిలో.. ఆశా రేఖ
కరోనా నియంత్రణ కోసం లాక్డౌన్ కొనసాగుతున్న నేపథ్యంలో.... కేరళలో ఉంటున్న వినీత్ దంపతులు తమ చిన్నారిని వేరే రాష్ట్రంలోని ఆసుపత్రికి తీసుకెళ్లలేని పరిస్థితి ఏర్పడింది.
ఈ విషయం తెలుసుకున్న అలప్పుజ ఎంపీ ఏ.ఎం.ఆరిఫ్ .... పాప పరిస్థితిని రాష్ట్ర ప్రభుత్వం దృష్టికి తీసుకొచ్చారు. వెంటనే స్పందించిన కేరళ ఆరోగ్యమంత్రి కె.కె.శైలజ... అన్విత తల్లిదండ్రులతో మాట్లాడి, పాప ఆరోగ్యం, చికిత్స వివరాలు తెలుసుకున్నారు.
రంగంలోకి పినరయి విజయన్
మంత్రి ద్వారా చిన్నారి అన్విత విషయం తెలుసుకున్న కేరళ ముఖ్యమంత్రి పినరయి విజయన్ స్వయంగా రంగంలోకి దిగారు. సామాజిక భద్రత (సోషల్ సెక్యూరిటీ) మిషన్ సహాయంతో అన్వితను రోడ్డు మార్గం ద్వారా హైదరాబాద్ తీసుకెళ్లాలని నిర్ణయించారు.
ఇందుకోసం అంతర్ రాష్ట్ర సరిహద్దుల వద్ద ఎలాంటి ఇబ్బందులు తలెత్తకుండా... తమిళనాడు, కర్ణాటక, ఆంధ్రప్రదేశ్, తెలంగాణ రాష్ట్రాల సహకారం తీసుకున్నారు.
హైదరాబాద్కు పయనం
కేరళ ప్రభుత్వం అన్విత కోసం ఓ హైటెక్ అంబులెన్స్ను సిద్ధం చేసింది. పటిష్ట పోలీసు భద్రత నడుమ ఆదివారం ఉదయం 7 గంటలకు అన్విత కుటుంబం అలప్పుజ నుంచి హైదరాబాద్కు బయలుదేరింది.
మరుసటి రోజే..
చిన్నారి అన్వితకు ఏప్రిల్ 7న కీమోథెరపీ చికిత్స చేయనున్నారు. ఆ మరుసటి రోజే ఆమె కుటుంబం తిరిగి కేరళకు పయనం కానుంది.
ఇదీ చూడండి: ఆ ప్రాంతాలు మినహా లాక్డౌన్ సడలింపు!
