వలస కార్మికులతో కాంగ్రెస్ నేత రాహుల్ గాంధీ శనివారం దిల్లీలో సమావేశమైన తీరును 'డ్రామా'గా అభివర్ణించారు కేంద్ర ఆర్థిక మంత్రి నిర్మలా సీతారామన్. ప్రస్తుతం దేశంలో నెలకొన్న క్లిష్ట పరిస్థితుల్లో.. ప్రధాన ప్రతిపక్ష పార్టీలు బాధ్యతాయుతంగా వ్యవహరించాలని కోరారు.
వలస కూలీల పిల్లలు, సామగ్రిని ఎత్తుకుని రాహుల్ వాళ్లతో కలిసి నడిచి ఉంటే బాగుండేది. రోజూ కేంద్రం చేసే పనుల్ని కాంగ్రెస్ 'డ్రామా' అని పిలుస్తుంది. మరి నిన్న కాంగ్రెస్ చేసిందేమిటి? రోడ్ల వెంట నడిచి వెళ్తున్న వలస కార్మికులతో కూర్చొని మాట్లాడేందుకు నిన్ననే సరైన సమయమా? ఇది డ్రామా కాదా?
కాంగ్రెస్ పాలిత రాష్ట్రాలు మరిన్ని రైళ్లు ఏర్పాటు చేసి, వలస కూలీలను స్వస్థలాలకు చేర్చడంపై దృష్టి పెట్టాలి. ఇలా నడిచి వెళ్తున్నవారితో కబుర్లు చెప్పడం మాని.. వలస కూలీల తరలింపుపై భాగస్వామ్య పక్షాలతో కలిసి పనిచేయాలి. మరిన్ని రైళ్లు ఏర్పాటు చేయాలని తమ పార్టీ సీఎంలకు, మిత్రపక్షాలకు చెందిన సీఎంలకు కాంగ్రెస్ అధిష్ఠానం ఎందుకు సూచించదు?
-నిర్మలా సీతారామన్, కేంద్ర ఆర్థికశాఖ మంత్రి.
వలస కార్మికుల విషయంలో మరింత బాధ్యతగా వ్యవహరించాలని కాంగ్రెస్ అధ్యక్షురాలు సోనియా గాంధీని అభ్యర్థించారు నిర్మల.
