కరోనా టీకాలో పంది నుంచి తీసిన ప్రోటీన్ ఉన్నా ఆ వాక్సిన్ తీసుకోవచ్చని జమాత్ ఏ ఇస్లామి హింద్(జేఐహెచ్) ముస్లిం సంస్థ తెలిపింది. వైద్యాధికారులు అనుమతించిన ఏ ఔషధాన్నైనా, టీకానైనా ముస్లింలు తీసుకోవచ్చని జేఐహెచ్ ఉపాధ్యక్షులు మహ్మద్ సలీం ఈటీవీ భారత్తో అన్నారు. ఈ విషయంలో ఫత్వాలు జారీచేయవద్దన్నారు.
ఔషధంలో పంది నుంచి తీసిన ప్రోటీనే వాడాలని కాకుండా దానికి ప్రత్యామ్నాయం ఉంటే ఎలాంటి సమస్య ఉండదు. ఒకవేళ ప్రత్యామ్నాయం లేక పోయినా పర్వాలేదు. ఆ ఔషధాన్ని, టీకాను ముస్లింలు తీసుకోవచ్చు. దీనికి ఫత్వాలు జారీచేయకూడదు. మనం తీసుకునే చాలా టానిక్లలో ఆల్కహాల్ వాడుతున్నారు. రోగం వచ్చినప్పుడు అవి మనం తీసుకుంటున్నాం కదా..
-మహ్మద్ సలీం ఇంజనీర్, జేఐహెచ్ ఉపాధ్యక్షుడు
చైనా తయారుచేసిన కరోనా టీకాలో పంది నుంచి తీసిన ప్రోటీన్ను వాడారని రాజా అకాడమీ ప్రధాన కార్యదర్శి సయీద్ నూర్ ఇటీవల అన్నారు. ఎట్టిపరిస్థితుల్లోనూ చైనా నుంచి టీకాను తేవొద్దని ప్రభుత్వాన్ని కోరారు. పంది నుంచి తీసిన ఎటువంటి పదార్థాన్నైనా ముస్లింలు తీసుకోవడం నిషిద్ధం అని అన్నారు.
పంది నుంచి తీసిన ప్రోటీన్ కరోనా టీకాలో ఉన్నా.. దాన్ని ఇస్లాం వ్యతిరేకించదని యూఏఈ ఫత్వా కౌన్సిల్ ఛైర్మన్ షేక్ అబ్దుల్లా బిన్ భయ్యా అన్నారు. ఇస్లాం మానవజాతి మేలును కోరుతుందని వ్యాఖ్యానించారు.
కరోనా టీకాపై వస్తున్న వదంతులను పట్టించుకోవద్దని ప్రఖ్యాత సున్నీ మతగురువు ఖలీద్ రషీద్ ఫిరంగీ మహాలీ..ముస్లింలకు సూచించారు. టీకాను తీసుకోవచ్చన్నారు.
ఇదీ చూడండి: కరోనా బాధితుల కోసం జమాతే ఇస్లామీ హింద్ ప్రత్యేక హెల్ప్లైన్
