కర్తార్పుర్ నడవా నిర్మాణంపై భారత్-పాక్ అధికారులు మరోసారి సమావేశమయ్యారు. అఠారీ-వాఘా సరిహద్దులో ఈ భేటీ జరుగుతోంది. భద్రతా పరమైన అంశాలతో పాటు ప్రత్యేక సందర్భాల్లో నడవా ద్వారా ఎంతమంది భక్తులను అనుమతించాలన్న అంశాలపై చర్చిస్తున్నట్లు సమాచారం. నడవా విధివిధానాలు, సాంకేతిక సమస్యలపైనా చర్చించే అవకాశం ఉంది.
ఎక్కువ భాగం పాక్లోనే..
కర్తార్పుర్ నడవా నిర్మాణం పూర్తయితో పంజాబ్‌ గురుదాస్‌పుర్ నుంచి... సిక్కులు అత్యంత పవిత్రమైన ప్రాంతంగా భావించే పాకిస్థాన్ కర్తార్పుర్‌లోని గురుద్వారా దాదర్ సాహిబ్కు నేరుగా రాకపోకలు సాగించొచ్చు. అయితే నడవా ఎక్కువ భాగం పాక్ భూభాగంలో ఉండనుంది. అందువల్ల వరదలను కూడా తట్టుకునేలా నడవాను నిర్మించాలని పాక్కు సూచిస్తోంది భారత్.
అక్టోబర్ 31కి పూర్తి
గురునానక్ 550వ జన్మదినోత్సవమైన 2019 నవంబర్‌ 12 లోపు కర్తార్పుర్ ప్రాజెక్టును పూర్తి చేసేందుకు భారత్ ప్రయత్నాలు ముమ్మరం చేసింది. అక్టోబర్ 31 నాటికి నడవా నిర్మాణం పూర్తి చేసేందుకు రూ. 500 కోట్లకు పైగా కేటాయించనున్నట్లు సమాచారం.
ప్రత్యేక సందర్భాల్లో 10 వేల మంది భక్తులు, సాధారణ రోజుల్లో 5 వేల మందిని పాక్ పంపించాలని భావిస్తోంది భారత్. దారి పొడవునా పటిష్ఠ భద్రత కోసం అధునాతన నిఘా వ్యవస్థను ఏర్పాటు చేయనుంది.
ఇదీ చూడండి: కర్తార్పుర్ నడవాపై భారత్-పాక్ మరోసారి..
