భారత్- చైనా మధ్య ఈ వారం మరో దఫా సైనిక చర్చలు జరగనున్న నేపథ్యంలో సరిహద్దుల్లో పరిస్థితులు అదుపులోకి వచ్చాయి. రెండు దేశాలకు చెందిన బలగాలు సరిహద్దు నుంచి వెనక్కు మళ్లాయి.
ఇరు దేశాల లెఫ్టినెంట్ జనరళ్ల మధ్య చర్చల అనంతరం చైనా బలగాలు వెనుదిరిగినట్లు ప్రభుత్వ వర్గాలు తెలిపాయి. గాల్వన్ లోయ, పీపీ-15, హాట్ స్ప్రింగ్స్లో 2-2.5 కిలోమీటర్ల దూరం వెనక్కు వెళ్లాయి. ఈ ప్రాంతాల్లో భారత్ కూడా బలగాలతో పాటు వాహనాలను వెనక్కు మళ్లించింది.
ఈ ప్రాంతాల్లోనే సైనిక భేటీలు..
ఈ వారంలో పెట్రోలింగ్ పాయింట్ 14 (గాల్వన్), గస్తీ పాయింట్ 15, హాట్ స్ప్రింగ్ ప్రాంతాల్లో రెండు సైన్యాల మధ్య చర్చలు జరగనున్నట్లు సమాచారం. బెటాలియన్ కమాండర్ స్థాయిలో హాట్లైన్ ద్వారా ఈ సమావేశాలు నిర్వహించనున్నట్లు అధికార వర్గాలు తెలిపాయి. తూర్పు లద్ధాఖ్లో తొలుత ఈ ప్రాంతాల్లోనే చైనా దూకుడును పెంచింది.
చైనాతో చర్చల్లో పాల్గొనడానికి భారత సైనిక బృందాలు ఇప్పటికే చుశూల్కు చేరుకున్నాయి. చర్చలకు సంబంధించి సీనియర్ అధికారులతో సమన్వయం చేస్తున్నాయి.
