నీతా కన్వార్.. చదువుతో పాటు పెళ్లి చేసుకోవాలని పాకిస్థాన్ సింధ్ నుంచి 18 ఏళ్ల క్రితం రాజస్థాన్కు వలస వచ్చారు. 4 నెలల క్రితం భారత పౌరసత్వాన్ని పొందారు. ఇప్పుడు ఏకంగా రాజస్థాన్లో జరుగుతున్న పంచాయతీ ఎన్నికల్లో పోటీ చేస్తున్నారు.
"12వ తరగతి వరకు పాకిస్థాన్ సింధ్లో చదువుకున్నా. తర్వాత ఆజ్మేర్లో బీఏ చదివా. నేను పాక్ నుంచి వచ్చి 18 ఏళ్లు అవుతోంది. 8 ఏళ్ల క్రితం పుణ్య ప్రతాప్ కరణ్ను పెళ్లి చేసుకున్నా. 4 నెలల క్రితం పౌరసత్వం లభించింది. ఇప్పుడు సర్పంచ్ ఎన్నికల్లో పోటీ చేస్తున్నా.
ఇక్కడి రాజ్పుత్ సంస్కృతి సంప్రదాయాలు నాకు నచ్చాయి. విద్య విషయంలో మహిళలకు అన్ని సదుపాయాలు ఉన్నాయి. ఇక్కడివారు నన్నెంతో బాగా చూసుకుంటారు. అందుకే పోటీలో నిలుచున్నా. మా మామయ్య 3 సార్లు సర్పంచ్గా పనిచేశారు. ఆయన ప్రోత్సాహంతోనే ఇప్పుడు పోటీ చేస్తున్నా. ఆయనే నాకు మార్గదర్శి."
-నీతా కన్వార్
ప్రతాప్ను పెళ్లి చేసుకున్న తర్వాత టోంక్ జిల్లా నట్వారాలో నివాసం ఉంటున్నారు 36 ఏళ్ల నీతా. ఆమె రాజ్పుత్ వర్గానికి చెందిన వారు. ఈ వర్గానికి చెందినవారు వివాహాల కోసం భారత్కు, ముఖ్యంగా జోధ్పుర్కు ఎక్కువగా వస్తారు.
పౌరసత్వ సవరణ చట్టంపై తీవ్ర దుమారం నేపథ్యంలో నీతా కథ చర్చనీయాంశమైంది. చదువుకోవాలనుకున్న వారికి, భారత్లో మంచి జీవితం గడపాలనుకున్న వారికి సీఏఏ ఎంతో ఉపయోగకరమని చెబుతున్నారామె.
ఇదీ చదవండి: 'ఇందిర-కరీం' వ్యాఖ్యలపై వెనక్కి తగ్గిన రౌత్
