జమ్ముకశ్మీర్ చరిత్రలో గురువారం నుంచి సరికొత్త అధ్యాయం మొదలుకానుంది. ఇప్పటి వరకు లద్దాఖ్తో కలిపి జమ్ముకశ్మీర్ రాష్ట్రాన్ని చూసిన దేశ ప్రజలు.. ఇకపై రెండు వేర్వేరు కేంద్రపాలిత ప్రాంతాలుగా చూడనున్నారు. 29 రాష్ట్రాలు, 7 కేంద్రపాలిత ప్రాంతాలుగా ఉన్న భారతదేశం.. 28 రాష్ట్రాలు, 9 కేంద్ర పాలిత ప్రాంతాలతో 'నవ భారతం'గా రూపుదిద్దుకోనుంది. ప్రత్యేక ప్రతిపత్తి కల్పించే 370 అధికరణానికి ముగింపు పలికి.. భారత చట్టంలో సరికొత్త 'కశ్మీరం' దర్శనమివ్వనుంది.
దశాబ్దాలుగా నలుగుతున్న కశ్మీర్ అంశంపై మోదీ ప్రభుత్వం ఈ ఏడాది ఆగస్టు 5న సంచలన నిర్ణయం తీసుకుని.. ఆర్టికల్ 370ని రద్దు చేసింది. జమ్ముకశ్మీర్ను రెండు కేంద్రపాలిత ప్రాంతాలుగా చేస్తూ పునర్విభజన బిల్లు ప్రవేశపెట్టింది. ఈ ఏడాది ఆగస్టులోనే పార్లమెంట్లో ఆమోదం పొందిన ఈ బిల్లుతో.. జమ్ముకశ్మీర్ శాసనసభ కలిగిన కేంద్ర పాలిత ప్రాంతంగా, లద్దాఖ్ శాసనసభ లేని కేంద్రపాలిత ప్రాంతంగా విడిపోయాయి. భారత తొలి హోంమంత్రి సర్దార్ వల్లభ్భాయ్ పటేల్ జయంతి సందర్భంగా ఇవాళ అర్ధరాత్రి నుంచే ఈ చట్టం అమలులోకి రానుంది.
రేపే లెఫ్టినెంట్ గవర్నర్ల ప్రమాణం
జమ్ముకశ్మీర్, లద్దాఖ్ లెఫ్టినెంట్ గవర్నర్లుగా ఐఏఎస్ అధికారులు గిరీశ్ చంద్ర ముర్ము, ఆర్కే మథుర్లు గురువారం ప్రమాణస్వీకారం చేయనున్నారు. ఇందుకోసం శ్రీనగర్, లేహ్లో వేర్వేరు కార్యక్రమాలు నిర్వహించనున్నారు. జమ్ముకశ్మీర్ హైకోర్టు ప్రధాన న్యాయమూర్తి జస్టిస్ గీతా మిత్తల్ ఈ ఇద్దరితో ప్రమాణం చేయించనున్నారు.
ఆగస్టు 5న పార్లమెంట్ ఆమోదం
1947 అక్టోబర్ 24 నుంచి ప్రత్యేక ప్రతిపత్తితో ఉన్న కశ్మీర్ను భారతదేశంలోని ఇతర రాష్ట్రాలతో సమానం చేస్తూ.. ఆగస్టు 5న నరేంద్ర మోదీ 2.0 ప్రభుత్వం సంచలన నిర్ణయం తీసుకుంది. ఆర్టికల్ 370,35ఏ రద్దుతో పాటు జమ్ముకశ్మీర్ను రెండు కేంద్రపాలిత ప్రాంతాలుగా విభజిస్తూ ప్రవేశపెట్టిన బిల్లును పార్లమెంట్ ఆమోదించింది. ఈ చట్టం ప్రకారం కశ్మీర్లో మరిన్ని మార్పులు జరగనున్నాయి. అవేంటంటే..
2019 జమ్ముకశ్మీర్ పునర్విభజన చట్టం ప్రకారం..
⦁ రెండు రాష్ట్రాలకు వేర్వేరు లెఫ్టినెంట్ గవర్నర్లు ఉంటారు.
⦁ ప్రస్తుతం జమ్ముకశ్మీర్లోని ఐఏఎస్, ఐపీఎస్ అధికారులు రెండు కేంద్రపాలిత ప్రాంతాల్లోనూ యధాతథంగా బాధ్యతలు నిర్వర్తిస్తారు.
⦁ రెండు ప్రాంతాల్లోని ఐఏఎస్, ఐపీఎస్, ఏసీబీ(అవినీతి నిరోధకశాఖ) అధికారులతో పాటు ఇతర కేంద్ర విభాగ అధికారులు లెఫ్టినెంట్ గవర్నర్ ఆధీనంలో ఉంటారు. రాష్ట్ర ప్రభుత్వానికి వీరిపై ఎలాంటి అధికారం ఉండదు.
చివరి ముఖ్యమంత్రి, గవర్నర్ వీరే
ఉమ్మడి జమ్ముకశ్మీర్కు చివరి ముఖ్యమంత్రి, గవర్నర్గా మెహబూబా ముఫ్తీ, సత్యపాల్ మాలిక్ బాధ్యతలు నిర్వర్తించారు.
ఒక రాష్ట్రం.. కేంద్ర పాలిత ప్రాంతంగా మారడం దేశ చరిత్రలో ఇదే తొలిసారి కావడం గమనార్హం.
