జమ్ముకశ్మీర్లో అలజడి సృష్టించేందుకు మూడు వేర్వేరు చోట్ల జరిగిన ఉగ్ర కుట్రల్ని భద్రతా బలగాలు భగ్నం చేశాయి.
జాతీయ రహదారిపై బాంబు
పుల్వామా తరహాలో మరో భారీ ఉగ్రదాడికి ముష్కరులు ప్రయత్నించగా భద్రతా సిబ్బంది తిప్పికొట్టారు. పూంచ్ జిల్లా కల్లార్ మోడ్ ప్రాంతంలో జమ్ము-పూంచ్ జాతీయ రహదారిపై శక్తిమంతమైన పేలుడు పదార్ధాలను గుర్తించారు. కాసేపు ఆ మార్గంలో రాకపోకలు నిలిపేశారు. అతి కష్టం మీద ఆ ఐఈడీలను నిర్వీర్యం చేశారు.
ఆ ప్రాంతంలో ఇంకేమైనా పేలుడు పదార్ధాలు ఉన్నాయేమో గుర్తించడం సహా దాడికి యత్నించిన ముష్కరులను పట్టుకునేందుకు గాలింపు చర్యలు చేపట్టారు అధికారులు.
జమ్ములో ఉగ్రస్థావరం
పూంచ్ జిల్లాలో ఓ రహస్య ఉగ్రస్థావరం బయటపడింది. సురన్కోటేలో కొందరు వ్యక్తులు అనుమానాస్పదంగా తిరగడంపై స్థానికులు పోలీసులకు సమాచారం ఇచ్చారు. ధైర్ అటవీ ప్రాంతంలో పోలీసులు గాలింపు చర్యలు చేపట్టారు. 7 ఐఈడీలు, ఇతర సామగ్రి స్వాధీనం చేసుకున్నారు.
నలుగురు ఉగ్రవాదులు అరెస్ట్
జులైలో పుల్వామాలో జరిగిన ఓ ఉగ్రదాడితో సంబంధమున్న నలుగురిని పోలీసులు అరెస్టు చేశారు. ఐర్హల్ ప్రాంతానికి చెందిన వీరు విదేశీ ఉగ్రవాదులతో నిరంతర సంప్రదింపులు జరుపుతున్నట్లు కొంతకాలం క్రితం గుర్తించారు. వీరికి జైషే మహ్మద్ ఉగ్రవాద సంస్థతో సంబంధాలు ఉన్నట్లు పక్కా ఆధారాలు సేకరించారు. నలుగురిని అదుపులోకి తీసుకున్నారు.
ఇదీ చదవండి:శ్రీలంకలో మళ్ళీ రాజపక్స ఏలుబడి!
