భారత సుప్రీంకోర్టు మాజీ ప్రధాన న్యాయమూర్తి జస్టిస్ రాజేంద్ర మల్ లోధాను మోసగించారు సైబర్ నేరగాళ్లు. ఆయన స్నేహితుడి ఈ-మెయిల్ను హ్యాక్ చేసిన దుండగులు లక్ష రూపాయలు కాజేశారు. మోసాన్ని గ్రహించి దక్షిణ దిల్లీలోని మాలవ్యానగర్ పోలీసుస్టేషన్లో ఫిర్యాదు చేశారు జస్టిస్ లోధా.
ఈ-మెయిల్ ద్వారా..
మే 19 రాత్రి తన స్నేహితుడు, మాజీ సహోద్యోగి జస్టిస్ బీపీ సింగ్ నుంచి ఈ-మెయిల్ వచ్చిందని జస్టిస్ లోధా తెలిపారు.
"తన సోదరుడు లింఫోబ్లాస్టిక్ లుకేమియాతో బాధపడుతున్నాడని, చికిత్సకు అవసరమయ్యే డబ్బులు లేవని బీపీ సింగ్ మెయిల్ చేశారు. సాయం చేయాలని కోరగా వెంటనే వారు సూచించిన బ్యాంకు ఖాతాకు లక్ష రూపాయలు పంపించాను. తన ఈమెయిల్ ఖాతాను ఎవరో హ్యాక్ చేశారని మే 30న సింగ్ తెలిపిన తర్వాత మోసపోయానని గ్రహించా."
-జస్టిస్ లోధా, మాజీ సీజేఐ
జస్టిస్ లోధా భారత 41వ ప్రధాన న్యాయమూర్తిగా పనిచేశారు. 2014 సెప్టెంబర్లో పదవీ విరమణ చేశారు. బీసీసీఐలో సంస్కరణల కోసం నియమించిన కమిటీకి జస్టిస్ లోధానే నేతృత్వం వహిస్తున్నారు.
ఇదీ చూడండి: 'గన్ లైసెన్స్ కావాలంటే మొక్కలు నాటాల్సిందే'
