భారత త్రివిధ దళాల తొలి సంయుక్త నిర్వహణ కేంద్ర నిర్మాణాన్ని ఈ ఏడాది జూన్లోగా పూర్తి చేసే ప్రక్రియ వేగంగా జరుగుతోంది. దీని ఏర్పాటుకు సంబంధించిన చర్చలను సైన్యాధిపతి ముకుంద్ నరవణే, వాయుసేన అధిపతి ఆర్కేఎస్ భదౌరియాలతో జరుపుతున్నారు సీడీఎస్ బిపిన్ రావత్.
భారత వాయిసేన ఆధ్వర్యంలో ఈ కేంద్రాన్ని నిర్వహించనున్నారు. ఎయిర్ మార్షల్ అధికారి దీనికి సారథ్యం వహిస్తారని అధికారిక వర్గాలు తెలిపాయి. దీనితో పాటు సంయుక్త థియేటర్ కమాండ్లను ఏర్పాటు చేసే ప్రణాళికను రావత్ రూపొందిస్తున్నట్లు తెలుస్తోంది. అంతేకాకుండా సంయుక్త ద్వీపకల్ప, రవాణా వ్యవస్థ కమాండ్లను నిర్మించే యోచనలో ఉన్నట్లు సమాచారం.
ఈ కమాండ్ల నిర్వహణకు అదనపు జనరల్ ర్యాంకు పోస్టులను సృష్టించే అవకాశం లేదని అధికారిక వర్గాలు పేర్కొన్నాయి. థియేటర్ కమాండ్ల నిర్వహణను త్రివిధ దళాల్లోని లెఫ్టినెంట్ జనరల్ ర్యాంకు అధికారులు చేపట్టనున్నట్లు తెలిపాయి.
