కరోనాకు సంబంధించిన నిబంధనలు ఉల్లంఘించిన కారణంగా దిల్లీలోని ప్రముఖ సర్ గంగారామ్ ఆసుపత్రిపై కేసు నమోదైంది. దిల్లీ వైద్య ఆరోగ్యశాఖకు చెందిన అధికారి ఫిర్యాదు మేరకు పోలీసులు ఎఫ్ఐఆర్ నమోదు చేశారు. సుమారు 675 పడకలు ఉన్న ఈ ఆసుపత్రిని జూన్‌ 3న కొవిడ్‌ సేవలు అందించేందుకు దిల్లీ ప్రభుత్వం అనుమతించింది. అయితే, ఆసుపత్రి యాజమాన్యం ఉత్తర్వులను బేఖాతరు చేసిందంటూ ఇచ్చిన ఫిర్యాదుపై ఐపీసీ సెక్షన్‌ 188 కింద కేసు కేసు నమోదు చేశారు.
కరోనా పరీక్షలకు ఆర్‌టీ-పీసీఆర్‌ యాప్‌ను వినియోగించకపోవడమే కారణమని పోలీసులు ఎఫ్‌ఐఆర్‌లో పేర్కొన్నారు. దిల్లీ ప్రభుత్వ నిబంధనల ప్రకారం శాంపిళ్లను సేకరించే ల్యాబ్స్‌ తప్పనిసరిగా ఈ యాప్‌ను వాడాల్సి ఉంది. సదరు ఆసుపత్రి ఆ యాప్‌ను వినియోగించకపోవడం వల్ల అంటు వ్యాధుల చట్టం 1897 కింద కొవిడ్‌ -19 నిబంధనలు పాటించని కారణంగా కేసు నమోదు చేశారు. కేంద్ర వైద్య ఆరోగ్యశాఖ ఈ యాప్‌ను తీసుకురాగా.. దిల్లీ ప్రభుత్వం యాప్‌ వినియోగాన్ని తప్పనిసరి చేసింది
