ఫేస్బుక్ ఎప్పటికీ తటస్థ వేదిక అని.. పక్షపాతరహితంగా వ్యవహరిస్తుందని ఆ సంస్థ భారత విభాగం అధిపతి అజిత్ మోహన్ అన్నారు. ఫేస్బుక్ ఎవరివల్లా ప్రభావితం కాలేదని.. ఈ వ్యవహారాల్లో ఏ ఒక్కరూ జోక్యం చేసుకునేందుకు అవకాశమే లేదని స్పష్టం చేశారు. ఫేస్బుక్ ఇండియాను.. భాజపా నేతలు ప్రభావితం చేస్తున్నారన్న ఆరోపణలను ఆయన ఖండించారు. ఈ సామాజిక మాధ్యమ వేదిక పూర్తి స్వతంత్రంగా వ్యవహరిస్తుందని ఉద్ఘాటించారు.
అధికార భాజపా నేతలు విద్వేషపూరిత ప్రసంగాలు చేసినా.. దేశంలో తమ వ్యాపార ప్రయోజనాలు కాపాడుకొనేందుకు ఫేస్బుక్ ఎలాంటి చర్యలు తీసుకోవడం లేదని ఇటీవల 'ది వాల్స్ట్రీట్ జర్నల్'లో ఓ కథనం ప్రచురితమైంది. ఈ నేపథ్యంలోనే స్పందించారు అజిత్ మోహన్.
కంటెంట్ నిర్వహణలో ఫేస్బుక్ నిష్పాక్షిక విధానాలను కలిగి ఉందని ఆయన పేర్కొన్నారు. ప్రపంచవ్యాప్తంగా ఏ రాజకీయ పార్టీల సిద్ధాంతాలు, సాంస్కృతిక, మత విశ్వాసాలకు అతీతంగా పనిచేసే వ్యవస్థ.. అమల్లో ఉందని వెల్లడించారు ఫేస్బుక్ భారత విభాగం ఎండీ అజిత్ మోహన్.
ఫేస్బుక్కు ఆరంభం నుంచి నిర్దేశిత లక్ష్యాలు ఉన్నాయని.. ఆ కార్యాచరణతోనే ముందుకు వెళ్తుందని స్పష్టం చేశారు మోహన్.
ఫేస్బుక్కు భారత్లో 30 కోట్ల మంది వినియోగదారులు ఉన్నారు. దాని అనుబంధ సంస్థ.. ప్రముఖ మెసేజింగ్ యాప్ వాట్సాప్కు 40 కోట్ల మందికిపైగా యూజర్లు ఉన్నారు.
మొత్తంగా ఈ వివాదంతో ఫేస్బుక్ విద్వేషపూరిత పోస్ట్‌ల విషయంలో చిత్తశుద్ధి నిరూపించుకోవాల్సిన పరిస్థితులు ఏర్పడ్డాయి. వాల్ స్ట్రీట్ జర్నల్ ప్రచురించిన కథనంతో.. ఫేస్బుక్కు ఇబ్బందులు తలెత్తాయి. ఈ పరిస్థితుల్లో ఫేస్బుక్ వివరణ ఇచ్చుకునేందుకు ప్రయత్నిస్తోంది. అయితే, రాజకీయ దుమారం రేగడం వల్ల... ఫేస్బుక్ మున్ముందు ఎలా వ్యవహరిస్తుందన్నది ఆసక్తికరంగా మారింది.
ఇదీ చదవండి: వివాదంలో బుక్కైన ఫేస్బుక్.. అసలేంటీ రగడ?
