కేరళలో గర్భిణి ఏనుగు మరణించిన ఉదంతంపై కేంద్ర దర్యాప్తు సంస్థ సీబీఐ లేదా ప్రత్యేక దర్యాప్తు బృందంతో విచారణ జరిపించాలంటూ సుప్రీంకోర్టులో ప్రజాప్రయోజన వ్యాజ్యం దాఖలైంది. దిల్లీకు చెందిన అవద్ బిహారి కౌషిక్ అనే న్యాయవాది ఈ పిటిషన్ దాఖలు చేశారు.
ఈ ఘటన వెనుక ఏనుగులను చంపేందుకు ఓ వ్యవస్థీకృత ముఠానే ఉన్నట్లు తెలిపారు కౌషిక్. ఇటువంటి వాటి నుంచి జంతువులను కాపాడటంలో అధికారులు విఫలమయ్యారని పేర్కొన్నారు.
కేరళలోని కొల్లాం జిల్లా పథనంపురంలో ఏప్రిల్‌లో ఇదే తరహాలో మరో ఏనుగు చనిపోయిన విషయాన్ని కోర్టు దృష్టికి తెచ్చారు. ఈ తరహా కేసులకు సంబంధించిన పూర్తి రికార్డులను కోర్టుకు సమర్పించేలా అధికారులను ఆదేశించాలని కోరారు.
దేశవ్యాప్తంగా చోటుచేసుకుంటున్న ఏనుగుల హత్యలపై దర్యాప్తు జరిపేందుకు సుప్రీంకోర్టు మాజీ న్యాయమూర్తితో కూడిన ప్రత్యేక దర్యాప్తు బృందాన్ని ఏర్పాటు చేసేలా ఆదేశాలివ్వాలని పిటిషన్లో పేర్కొన్నారు.
ఇది చూడండి : 'భరించలేని నొప్పి, ఆకలితోనే ఏనుగు మృతి'
ఇదీ చూడండి : మనిషిని నమ్మడమే అది చేసిన తప్పు
