దేశంలో కరోనా కేసుల రెట్టింపు సమయంలో మార్పు వస్తోంది. గతంలో కేసులు 'డబుల్' అయ్యేందుకు 11.1 రోజులు పట్టగా... ప్రస్తుతం 13.9 రోజులు పడుతున్నట్లు చెప్పారు కేంద్ర వైద్య ఆరోగ్య శాఖ మంత్రి డా.హర్షవర్ధన్. గడిచిన 24 గంటల్లో 14 రాష్ట్రాలు, కేంద్ర పాలిత ప్రాంతాల్లో ఒక్క కేసూ నమోదు కాలేదన్నారు. దేశంలో కరోనా మరణాల సంఖ్య 2,549కి చేరగా, పాజిటివ్ కేసుల సంఖ్య 78,003కు పెరిగినట్లు తెలిపారు.
గుజరాత్, తెలంగాణ, ఆంధ్రప్రదేశ్, చండీగఢ్, ఛత్తీస్గఢ్, ఝార్ఖండ్, అండమాన్ నికోబార్, అరుణాచల్ ప్రదేశ్, దాద్రా నగర్ హవేలి, గోవా, మణిపుర్, మేఘాలయ, మిజోరం, పుదుచ్చేరి, దమన్ దయ్యూ, సిక్కిం, నాగలాండ్, లక్ష్యద్వీప్లలో గత 24 గంటల్లో సున్నా కేసులు నమోదయ్యాయి.
కోబాస్ యంత్రం జాతికి అంకితం..
కరోనా పరీక్షలు వేగంగా చేసేందుకు స్వదేశీ పరిజ్ఞానంతో తయారు చేసిన కోబాస్ 6800 యంత్రాన్ని.. జాతికి అంకితం చేశారు కేంద్రమంత్రి. ఇది పూర్తిగా స్వయం చాలకమని, ఉన్నత స్థాయి ప్రమాణాలతో రూపొందినట్లు వివరించారు. జాతీయ అంటువ్యాధుల నియంత్రణ కేంద్రం(ఎన్సీడీసీ) సందర్శన సందర్భంగా ఈ వివరాలు వెల్లడించారు డా.హర్షవర్ధన్. కోబాస్తో 24 గంటల్లోనే 1200 నమూనాలు పరీక్షించవచ్చన్నారు.
దేశంలో కరోనా టెస్టుల సామర్థ్యం లక్షకు చేరుకున్నట్లు చెప్పారు హర్షవర్ధన్. ఇప్పటివరకు మొత్తం 20 లక్షల టెస్టులు పూర్తి చేసినట్లు తెలిపారు. దేశవ్యాప్తంగా 500కి పైగా ల్యాబ్లు అందుబాటులో ఉన్నాయని.. వాటిల్లో 359 ప్రభుత్వం పరిధిలోనివని వివరించారు. కరోనాపై పోరాడుతున్న వీరులకు సెల్యూట్ చేశారు.
దేశవ్యాప్తంగా గత 24 గంటల్లో 3,722 కొత్త కేసులు నమోదయ్యాయి. 134 మంది మరణించారు.
